സീതത്തോട് : സീതത്തോട് പഞ്ചായത്തിലെ വനം-കർഷക മേഖല അതിർത്തികളിൽ സോളാർ ഫെൻസിങ് സ്ഥാപിക്കുന്നതിൽ പൂർണ്ണ സുതാര്യത ഉറപ്പാക്കണമെന്ന് ഐക്യ കർഷക സംഘം സംസ്ഥാന ജോയിന്റ് സെക്രട്ടറി രവി പിള്ള ആവശ്യപ്പെട്ടു. ഐക്യ കർഷക സംഘം സീതത്തോട് പഞ്ചായത്ത് കൺവൻഷൻ ഉദ്ഘാടനം ചെയ്തുകൊണ്ട് സംസാരിക്കുകയായിരുന്നു അദ്ദേഹം. സോളാർ ഫെൻസിങ്ങിനെക്കുറിച്ച് യാതൊരു അറിവുമില്ലാത്ത കരാറുകാരെയും അവിദഗ്ധ തൊഴിലാളികളെയും ഉപയോഗിച്ചുള്ള നിലവാരമില്ലാത്ത നിർമാണ പ്രവർത്തനങ്ങൾ എത്രയും പെട്ടെന്ന് അവസാനിപ്പിക്കണം.
ഇതിന് പകരമായി ഇ-ടെൻഡറിങ് സമ്പ്രദായം കർശനമായി നടപ്പിലാക്കി ഉദ്യോഗസ്ഥ-രാഷ്ട്രീയ കൂട്ടുകെട്ടിലെ അഴിമതി അവസാനിപ്പിക്കാൻ വനംവകുപ്പും സർക്കാരും തയ്യാറാകണമെന്നും ഐക്യ കർഷക സംഘം സീതത്തോട് പഞ്ചായത്ത് കമ്മിറ്റി ആവശ്യപ്പെട്ടു. ആർ.എസ്.പി ജില്ലാ സെക്രട്ടേറിയേറ്റ് അംഗം ചിറ്റാർ രാധാകൃഷ്ണൻ മുഖ്യപ്രഭാഷണം നടത്തി. കോന്നി മണ്ഡലം പ്രസിഡന്റ് ഷൈലജ പ്രദീപ്, ഷാലു ജോസഫ്, മജു എബ്രഹാം, സീതത്തോട് മുൻ പഞ്ചായത്ത് വൈസ് പ്രസിഡന്റ് രാജൻ ഉതുപ്പാൻ, ജോർജ് വർഗീസ്, പ്രശാന്ത് ടി.വർഗീസ്, സുനിൽ മാത്യു, എൽസമ്മ തുടങ്ങിയവർ പ്രസംഗിച്ചു.
