ചെങ്ങന്നൂര് : വഴിയോര കച്ചവടക്കാരെ ഒഴിപ്പിക്കുന്നതിനിടെ ചെങ്ങന്നൂരില് തട്ടുകട ഉടമയായ വയോധികന് ആത്മഹത്യയ്ക്ക് ശ്രമിച്ചു. കൊല്ലം – തേനി പാതയുടെ വികസനവുമായി ബന്ധപ്പെട്ട് എം.സി റോഡില് പുത്തന്വീട്ടില് പടി കവലയ്ക്ക് സമീപമാണ് സംഭവം. ഇല്ലിമല പാലത്തിനോട് ചേര്ന്ന് തട്ടുകട നടത്തുന്ന ളാഹശ്ശേരി കണിയാരിക്കല് വീട്ടില് വേണു (60) ആണ് ശനിയാഴ്ച രാവിലെ ആത്മഹത്യാശ്രമം നടത്തിയത്.
ഒഴിപ്പിക്കല് നടപടിയുമായി ബന്ധപ്പെട്ട ഉദ്യോഗസ്ഥര് ജെ.സി.ബി ഉള്പ്പടെയുള്ള സാധനങ്ങളുമായി എത്തിയപ്പോഴാണ് പെട്രോള് ദേഹത്ത് ഒഴിച്ച് ആത്മഹത്യാ ഭീഷണി മുഴക്കിയത്. പോലീസ് വിവരമറിയിച്ചതിനെ തുടര്ന്ന് ഫയര്ഫോഴ്സ് സ്ഥലത്തെത്തിയെങ്കിലും പിടികൊടുക്കാതെ ഓടി. തുടര്ന്ന് അഗ്നിശമന സേനാംഗങ്ങള് കീഴ്പ്പെടുത്തി പോലീസിന് കൈമാറി. രോഗവും കടബാധ്യതകളുംമൂലം പ്രയാസമനുഭവിക്കുന്ന വ്യക്തിയാണ് വേണുവെന്ന് പോലീസ് പറഞ്ഞു.