ചുങ്കപ്പാറ : കോട്ടാങ്ങൽ – ചാലാപ്പള്ളി ബാസ്റ്റോ റോഡിൽ ചുങ്കപ്പാറ മുതൽ സെൻ്റ്ജോർജ് ഹൈസ്കൂൾ പടി വരെ വിവിധ സ്ഥലങ്ങളിൽ റോഡിന്റെ വശങ്ങളിലെ ഓടയ്ക്ക് മൂടിയില്ലാത്തത് അപകട ഭീഷണിയാകുന്നു. ഓട കാണാത്തവിധം പലയിടത്തും കാടുമൂടിയ നിലയിലുമാണ്. കോട്ടാങ്ങൽ സർവ്വീസ് സഹകരണ ബാങ്കിനു സമീപവും, ടൗണിലും ഓടക്ക് മൂടിയില്ലാത്ത നിലയിലാണ്. ഓടയും റോഡു കാണാത്ത വിധം പലയിടത്തും കാടുമൂടിയിരിക്കുകയാണ്. ഇത് അപകടം ക്ഷണിച്ചുവരുത്തുന്നതിന് കാരണമാകുന്നതായി പരാതി ഉയർന്നിട്ട് നാളുകൾ ഏറെയായിട്ടും അധികൃതരുടെ ഭാഗത്തുനിന്നും നടപടി ഉണ്ടാകുന്നില്ലെന്നും ആക്ഷേപവും ഉയർന്നിട്ടുണ്ട്. ഓടയുടെ പലിയിടത്തും പകുതി വീതം മാത്രമാണ് മൂടി ഉള്ളത് ബാക്കിഭാഗം ഉപേക്ഷിക്കപ്പെട്ട നിലയാണ്.
രണ്ട് സ്കൂളുകളിലെ നിരവധി വിദ്യാർഥികൾ കാൽ നടയായി പോകുന്ന നടപ്പാതയിലെ ഓടയുടെ സ്ലാബ് തെന്നിമാറിയത് അപകടഭിഷണിക്ക് കാരണമാകുന്നു. സെൻ്റ് ജോർജ് ഹൈസ്കൂളിന് സമീപമാണ് അപകടം പതിയിരിക്കുന്നത്. റോഡിലെ തിരക്ക് ഒഴിവാക്കി വിദ്യാർഥികൾ നടന്നു പോകുന്ന പാത കൂടിയാണിത്. സ്കൂൾ തുറക്കുന്നതിന് ദിവസങ്ങൾ മാത്രമാണ് ഇനിയുള്ളത് എന്നിട്ടും അധികൃതർ നടപടി സ്വികരിക്കുന്നില്ല. റോഡ് ഉന്നത നിലവാരത്തിൽ ഉയർത്തി ടാറിങ് നടത്തിയതല്ലാതെ അപകടങ്ങൾ ഒഴിവാക്കാനുള്ള മറ്റ് പ്രവൃത്തികൾ പൂർത്തികരിക്കാത്തത് ഇവിടെ അപകടങ്ങൾ തുടർക്കഥയാകുന്നതിന് കാരണമാകുന്നതായി നാട്ടുകാർ പറയുന്നു.
