ന്യൂഡൽഹി: ഓണക്കാലത്തെ യാത്രാതിരക്ക് പരിഗണിച്ച് കേരളത്തിലേക്ക് കൂടുതൽ പ്രത്യേക ട്രെയിനുകൾ അനുവദിച്ച് റെയിൽവേ. ഇതിന്റെ ഭാഗമായി ചെന്നൈ-കൊല്ലം റൂട്ടിൽ വീക്കിലി എക്സ്പ്രസ്സ് സർവീസ് നടത്തും. ഓഗസ്റ്റ് 12, 19, 26, സെപ്റ്റംബർ 2 എന്നീ തീയതികളിലാണ് ഈ ട്രെയിൻ സർവീസ് നടത്തുക. കൂടാതെ, തിരുവനന്തപുരം-താംബ്രം റൂട്ടിലും സമാനമായ രീതിയിൽ വീക്കിലി എക്സ്പ്രസ്സ് സർവീസുകൾ ഉണ്ടാകും. ചെന്നൈ-കൊല്ലം എക്സ്പ്രസ്സ് സർവീസ് നടത്തുന്ന അതേ തീയതികളിൽ തന്നെയാണ് തിരുവനന്തപുരം-താംബ്രം എക്സ്പ്രസ്സും സർവീസ് നടത്തുന്നത്. ഓണത്തോടനുബന്ധിച്ച് നാട്ടിലേക്ക് മടങ്ങുന്ന മലയാളികൾക്ക് ഈ അധിക സർവീസുകൾ വലിയ ആശ്വാസമായേക്കും.
നേരത്തെ, ഓണത്തിന് കേരളത്തിലേക്ക് നൂറ് ട്രെയിനുകൾ അധികസർവീസ് നടത്തുമെന്ന് റെയിൽവേ മന്ത്രി അശ്വിനി വൈഷ്ണവ് അറിയിച്ചിരുന്നു. പിന്നാലെയാണ് സ്പെഷ്യൽ ട്രെയിനുകളുടെ പ്രഖ്യാപനമെത്തിയിരിക്കുന്നത്. ആഘോഷവേളകളിൽ പലപ്പോഴും മാസങ്ങൾക്ക് മുന്നേ ട്രെയിൻ ബുക്കിങ്ങുകൾ മുഴുവനാകുന്നതിനാൽ ഏറെ യാത്രാദുരിതം നേരിടാറുണ്ടായിരുന്നു.
