കോഴിക്കോട്: കോഴിക്കോട് മുക്കം കൊടിയത്തൂരിൽ കളിക്കുന്നതിനിടെ ഒന്നര വയസ്സുകാരന്റെ തലയിൽ സ്റ്റീൽ പാത്രം കുടുങ്ങി. കുങ്ങഞ്ചേരി വീട്ടിൽ മുർഷിദിന്റെ മകൻ കളിക്കുന്നതിനിടെയാണ് ഈ അപകടം സംഭവിച്ചത്. പിതാവ് ബൈക്കിൽ യാത്ര ചെയ്യുമ്പോൾ ഹെൽമറ്റ് ധരിക്കുന്നത് കണ്ടുള്ള കൗതുകം തീർക്കാൻ പതിവായി പ്ലാസ്റ്റിക് പാത്രങ്ങൾ തലയിൽ വെച്ച് കളിക്കാറുണ്ടായിരുന്ന കുട്ടി, അബദ്ധത്തിൽ സ്റ്റീൽ പാത്രം തലയിൽ കയറ്റുകയായിരുന്നു.
പാത്രം തലയിൽ നിന്ന് ഊരാൻ സാധിക്കാതെ വന്നതോടെ കുട്ടിയുടെ കരച്ചിൽ കേട്ട് വീട്ടുകാർ പരിഭ്രാന്തരായി. ഉടൻ തന്നെ രക്ഷിതാക്കൾ കുട്ടിയുമായി മുക്കം അഗ്നിരക്ഷാ നിലയത്തിലെത്തി.
കുട്ടിക്ക് അപകടമൊന്നും സംഭവിക്കാത്ത രീതിയിൽ പാത്രം നീക്കം ചെയ്യുക എന്നതായിരുന്നു രക്ഷാപ്രവർത്തകരുടെ മുന്നിലുള്ള പ്രധാന വെല്ലുവിളി. ഗ്രേഡ് അസിസ്റ്റന്റ് സ്റ്റേഷൻ ഓഫീസർ സി. മനോജിന്റെ നേതൃത്വത്തിലുള്ള ഫയർ ഫോഴ്സ് സംഘം രക്ഷാപ്രവർത്തനം ഏറ്റെടുത്തു. പി.ടി. ശ്രീജേഷ്, മുഹമ്മദ് ഷനീബ്, എം. നിസാമുദ്ദീൻ, കെ.എം. ജിഗേഷ്, കെ.എസ്. ശരത്, അനു മാത്യു, എം.കെ. അജിൻ, കെ.എസ്. വിജയകുമാർ, പി.കെ. രാജൻ എന്നിവരടങ്ങുന്ന സംഘം മുക്കാൽ മണിക്കൂർ നീണ്ട പരിശ്രമത്തിനൊടുവിൽ അതീവ ശ്രദ്ധയോടെ പാത്രം മുറിച്ചുമാറ്റി കുട്ടിയെ സുരക്ഷിതനായി പുറത്തെടുത്തു.
