കോഴിക്കോട് : യുവാവിനെ വഴിയില് തടഞ്ഞ് ആക്രമണം നടത്തി സ്വര്ണക്കട്ടി കവര്ന്ന കേസില് ഒരാള് അറസ്റ്റില്. കക്കോടി മൂട്ടോളി സ്വദേശി കെ.കെ ലതീഷിനെയാണ് (37) കസബ പോലീസ് അറസ്റ്റ് ചെയ്തത്. കണ്ടംകുളം ജൂബിലി ഹാളിന് സമീപം സെപ്തംബര് 20-ന് രാത്രി പത്തരയോടെയാണ് കേസിനാസ്പദമായ സംഭവം നടന്നത്.
റെയില്വേ സ്റ്റേഷന് ലിങ്ക് റോഡിലെ സ്വര്ണ ഉരുക്കുശാലയില് നിന്നും മാങ്കാവിലെ താമസ സ്ഥലത്തേക്ക് കൊണ്ടുപോവുകയായിരുന്ന 1.2 കിലോഗ്രാം സ്വര്ണം ബംഗാള് വര്ധമാന് സ്വദേശി റംസാന് അലിയില് നിന്നാണ് കവര്ന്നത്. റംസാന് സഞ്ചരിച്ച ബൈക്കിനെ പിന്തുടര്ന്നെത്തിയ സംഘം പാളയം തളി ജൂബിലി ഹാളിനു മുന്നില് വെച്ച് തടഞ്ഞുനിര്ത്തുകയും കഴുത്തിന് പിടിച്ച് തള്ളി ചവിട്ടി വീഴ്ത്തിയശേഷം പാന്റ്സിന്റെ കീശയിലുണ്ടായിരുന്ന സ്വര്ണം തട്ടിപ്പറിച്ചെടുത്ത് കടന്നുകളയുകയായിരുന്നു.
