റാന്നി: മിനിസിവില് സ്റ്റേഷനില് തെരുവുനായയുടെ ആക്രമണത്തില് ഒരാള്ക്ക് കടിയേറ്റു. മറ്റൊരാള് ഓടി രക്ഷപ്പെട്ടു. നായയുടെ കടിയേറ്റ മക്കപ്പുഴ പനവേലിക്കുഴി ശാന്തമ്മ (78) റാന്നി താലൂക്ക് ആശുപത്രിയില് എത്തി ചികിത്സ തേടി. അഡ്വക്കേറ്റ്സ് ക്ലാര്ക്കായി ജോലി ചെയ്യുന്ന സ്ത്രീയാണ് തെരുവു നായയുടെ കടിയേല്ക്കാതെ ഓടി രക്ഷപ്പെട്ടത്. ഇന്ന് ഉച്ചയ്ക്ക് പന്ത്രണ്ടോടെ ട്രഷറിയുടെ സമീപത്താണ് ആക്രമണം ഉണ്ടായത്. സംഭവത്തെ തുടര്ന്ന് റാന്നി ഗ്രാമ പഞ്ചായത്ത് പ്രസിഡന്റ് കെ.ആര് പ്രകാശിന്റെ നേതൃത്വത്തില് ആളുകള് എത്തി നായകളെ ഓടിച്ചു വിടാന് ശ്രമിച്ചിരുന്നു. എന്നാല് അരമണിക്കൂറിന് ശേഷം വീണ്ടും നായകള് കെട്ടിട വരാന്തകളിലും ഒഴിഞ്ഞയിടങ്ങളിലും എത്തി തമ്പടിച്ചു തുടങ്ങി.
മിനി സിവില് സ്റ്റേഷനില് നായ ശല്യം തുടങ്ങിയിട്ട് നാളുകളായി. വരാന്തകള് നിറയെ ഇവ കൈയ്യടക്കിയിരിക്കുകയാണ്. ജീവനക്കാര് ഉപേക്ഷിക്കുന്ന ഉച്ചഭക്ഷണത്തിന്റെ അവശിഷ്ടങ്ങള് കഴിക്കാനെത്തിയവയാണിത്. ചിലതിന് ജീവനക്കാര് തന്നെ ഭക്ഷണം നല്കി വളര്ത്തുന്നുമുണ്ട്. എന്നാല് നായ പ്രേമികള്ക്കു നേരേയും ഇവ കടന്നാക്രമണത്തിന് മുതിരുന്നുണ്ട്. ഒരു മാസം മുമ്പ് കോടതിയിലേക്കു വന്ന അഡ്വക്കേറ്റിനേയും താലൂക്ക് ഓഫീസിലെ ജീവനക്കാരനേയും നായ കടിച്ച് പരിക്കേല്പ്പിച്ചിരുന്നു.
മുമ്പ് രാത്രികളില് ഓഫീസ് പരിസരത്ത് എത്തുന്ന അപരിചിതര്ക്കെതിരെ മാത്രമായിരുന്നു ഇവയുടെ ശല്യം. ഇപ്പോള് രാത്രി ഷിഫ്ടില് ജോലിക്കെത്തുന്ന ജീവനക്കാര്ക്ക് ഓഫീസില് കയറാനാവത്ത അവസ്ഥയുമുണ്ട്. കൂടാതെ വാഹനങ്ങളുടെ അടിയില് കയറി കിടക്കുന്ന നായകള് വാഹനത്തില് കയറാന് എത്തുന്നവരേയും അപ്രതീക്ഷിതമായി ആക്രമിക്കാറുണ്ട്. തെരുവു നായകളെ ഇവിടെ നിന്നും പൂര്ണ്ണമായും അകറ്റണമെന്ന ആവശ്യം ശക്തമാണ്.
