റാന്നി: സംസ്ഥാന പാതയിലെ ഇട്ടിയപ്പാറ ടൗണിലൂടെ വണ്വേ തെറ്റിച്ചു വാഹനങ്ങള് ചീറിപ്പായുന്നു. വണ്വേ നിലനില്ക്കുന്ന പാതയില് മാമുക്കില് നിന്നെത്തുന്ന വാഹനങ്ങള് കാവുങ്കല്പ്പടിയില് നിന്നു തിരിഞ്ഞ് കണ്ടനാട്ടുപ്പടി, മിനര്വാപ്പടി വഴി ഇട്ടിയപ്പാറ ടൗണിലെത്തണമെന്നാണ് നിര്ദേശം. എന്നാല് ചില വാഹനങ്ങള് ഇത് പാലിക്കുന്നില്ല. സ്വകാര്യ, കെ.എസ്.ആര്.ടി.സി ബസുകള് ഇട്ടിയപ്പാറ ബൈപാസില് നിന്നും തിരിഞ്ഞ് ശബരിമല ഇടത്താവളം നിര്മിക്കുന്ന സ്ഥലത്തു കൂടി ബസ് സ്റ്റാന്ഡിലെത്തണം. ചെറുതും വലുതുമായ വാഹനങ്ങള് മിക്കവയും വണ്വേ തിരിയാതെ നേരിട്ട് ഇട്ടിയപ്പാറയില് എത്തുകയാണ്. വണ്വേ തെറ്റിച്ചെത്തുന്ന വാഹനങ്ങളില് ഇടിക്കാതെ എതിരെയെത്തുന്ന വാഹനങ്ങള് വെട്ടിച്ചു മാറ്റുകയാണ് പതിവ്.
ഇരുചക്രവാഹനങ്ങളാണ് കൂടുതലും വണ്വേ തെറ്റിക്കുന്നത്. ഇട്ടിയപ്പാറ ബസ് സ്റ്റാന്ഡില് നിന്നും കോട്ടയം, എരുമേലി, മുണ്ടക്കയം, അത്തിക്കയം, ഇടമുറി ഭാഗങ്ങളിലേക്കുള്ള ബസുകള് സ്റ്റാന്ഡില് നിന്നും പുറത്തേക്കുള്ള പ്രധാന റോഡിലെത്തി കാവുങ്കല്പ്പടിയിലെത്തി വണ്വേ തിരിഞ്ഞു പോകണമെന്നാണ് മറ്റൊരു നിര്ദേശം. എന്നാല് മിക്ക ബസുകളും സ്റ്റാന്ഡിലേക്ക് എത്തിച്ചേരുന്ന ബൈറോഡിലൂടെ ഇട്ടിയപ്പാറ ബൈപാസിലെത്തുകയാണ് പതിവ്. സ്റ്റാന്ഡില് പത്തും പതിനഞ്ചു മിനിട്ട് കിടക്കുന്ന ബസുകളാണ് സമയക്കുറവു ചൂണ്ടിക്കാട്ടി ബൈപാസിലൂടെ കടന്നു പോകുന്നത്. കൂടാതെ തിരുവല്ല, മല്ലപ്പള്ളി, ചെറുകോല്പ്പുഴ ഭാഗത്തു നിന്നുമെത്തുന്ന ബസുകള് റാന്നി പെരുമ്പുഴ സ്റ്റാന്ഡില് എത്തുന്നില്ലെന്ന പരാതിയും പരിഹാരമില്ലാതെ തുടരുകയാണ്.
