കോട്ടയം : സ്കൂളുകളിലെ എല്ലാ വിദ്യാര്ഥികള്ക്കും ഓണ്ലൈന് ക്ലാസ് സംവിധാനം അധ്യാപകര് ലഭ്യമാക്കണമെന്ന് വിദ്യാഭ്യാസ വകുപ്പിന്റെ ഉത്തരവ് . ഓണ്ലൈന് ക്ലാസ് സൗകര്യമില്ലെന്ന് ഏതെങ്കിലും വിദ്യാര്ഥി പരാതിപ്പെട്ടാല് അതിനുള്ള പരിപൂര്ണ ഉത്തരവാദിത്വം പ്രഥമാധ്യാപകനായിരിക്കുമെന്ന് ഉത്തരവില് വ്യക്തമാക്കുന്നു.
ടെലിവിഷന്, സ്മാര്ട്ട്ഫോണ്, കമ്പ്യുട്ടര് നെറ്റ്വര്ക്ക് എന്നിവ കുട്ടിക്കു ലഭ്യമാണോ എന്നുറപ്പാക്കാതെ ഓണ്ലൈന് ക്ലാസുകള് സജീവമാക്കുമ്പോള് ഞെരുങ്ങുന്നത് അധ്യാപകരും രക്ഷിതാക്കളുമാണ് . ഓണ്ലൈന് അധ്യാപനം ഒരാഴ്ച പിന്നിടുമ്പോള് വിദ്യാര്ഥി ഓണ്ലൈനില് ഹാജരല്ലെങ്കില് മറുപടി ബോധിപ്പിക്കേണ്ടത് അധ്യാപകരുടെ ചുമതലയായിരിക്കുന്നു. അധ്യാപകര് അഡ്മിന്മാരായി വാട്സ് ആപ്പ് ഗ്രൂപ്പുകള് ഒരുക്കുകയും ഓണ്ലൈനില് ക്ലാസുകള് ആവുംവിധം ക്രമീകരിക്കുകയും ചെയ്യുന്നതിനിടെ ഓണ്ലൈന് പഠനം ക്രമീകരിക്കാന് സ്കൂള് അധ്യാപകര് പരക്കംപായുകയാണ് .
പാഠപുസ്തകം ലഭ്യമാകാത്തതിനാല് ഓണ്ലൈന് പഠനം പലര്ക്കും പ്രയോജനപ്പെടുത്താനാകുന്നില്ല. പുസ്തകം കൈവശമില്ലാതെ വിഷയങ്ങള് പഠിക്കുന്നതിലെ പരിമിതി വിദ്യാഭ്യാസ വകുപ്പ് പരിഗണിച്ചിട്ടില്ല . ഓണ്ലൈന് പഠനത്തിനു സ്കൂളിലെ ലാപ്ടോപ്പുകള് ഉപയോഗിക്കാന് അനുമതിയുണ്ട് . എന്നാല് കുട്ടികളെ ക്ലാസില് എത്തിച്ച് ഇത് ഉപയോഗിക്കാന് പാടില്ലെന്നും ഇന്നലെ പുറത്തിറങ്ങിയ ഉത്തരവില് വ്യക്തമാക്കുന്നു .
സ്വന്തമായി ഓണ്ലൈന് ടെലിവിഷന് സൗകര്യമില്ലാത്തവര് അയല്വാസികള്, ബന്ധുക്കള് എന്നിവരെ ആശ്രയിക്കുകയാണ് . വായനശാലകളിലും കമ്യൂണിറ്റി ഹാളുകളിലും കുട്ടികള്ക്കെത്തി പഠിക്കാന് അവസരം നല്കണമെന്നും പറയുന്നു . അതേസമയം ചെറിയ കുട്ടികളുടെ സുരക്ഷ എങ്ങനെ ഉറപ്പാക്കുമെന്നതിലും വ്യക്തതയില്ല . തൊഴിലാളികളും ഉദ്യോഗസ്ഥരുമായ രക്ഷിതാക്കള്ക്കു ജോലിക്കു പോകാതെ ഫോണും സംവിധാനങ്ങളുമായി വീട്ടില് പൂര്ണമായി സമയം ചെലവഴിക്കുക പ്രായോഗികമല്ല . കൂലിയും വരുമാനവുമില്ലാതെ വലയുന്ന രക്ഷിതാക്കള്ക്ക് ഇന്റര്നെറ്റും സ്മാര്ട്ട് ഫോണും വാങ്ങുക അതിലേറെ ബുദ്ധിമുട്ടാണ് ഉണ്ടാക്കുന്നത് .
