ഇടുക്കി: ഇടുക്കിയിൽ വന്യജീവി ആക്രമണങ്ങൾ തുടർച്ചയായിക്കൊണ്ടിരിക്കെ സ്വന്തം ജീവനും കൃഷിയിടങ്ങളും സംരക്ഷിക്കാൻ ജനങ്ങൾ സ്ഥാപിച്ച പ്രതിരോധ വേലികളും മതിലുകളും പൊളിച്ചുമാറ്റാനുള്ള ജില്ലാ കളക്ടറുടെ ഉത്തരവ് പ്രതിഷേധാർഹമാണെന്ന് കിഫ ചെയർമാൻ അലക്സ് ഒഴുകയിൽ പ്രസ്താവിച്ചു. 23-09-2026ലെ ഉത്തരവ് ജനങ്ങളുടെ ജീവിക്കാനുള്ള അവകാശത്തെയും സ്വാഭാവിക പ്രതിരോധാവകാശത്തെയും പ്രതികൂലമായി ബാധിക്കുന്നതാണ്. വന്യജീവി ആക്രമണം തടയുന്നതിന് പകരം, ജനവാസ മേഖലകളിലേക്കുള്ള വന്യമൃഗങ്ങളുടെ സഞ്ചാരം സുഗമമാക്കുന്ന നടപടിയാണ് ഇതിലൂടെ ഉണ്ടാകുന്നതെന്ന് കിഫ ചൂണ്ടിക്കാട്ടി.
ജനങ്ങളുടെ സുരക്ഷയ്ക്കായി സ്ഥാപിച്ച സംവിധാനങ്ങൾ നീക്കം ചെയ്യുന്നതിന് പകരം, വന്യമൃഗങ്ങളെ നിയന്ത്രിക്കുന്നതിനും വന്യജീവി ആക്രമണം കുറയ്ക്കുന്നതിനുമാണ് സർക്കാർ അടിയന്തര നടപടി സ്വീകരിക്കേണ്ടത്. ദുരന്തനിവാരണ നിയമത്തിലെ വ്യവസ്ഥകൾ ഉപയോഗിച്ച് ഇത്തരം സുരക്ഷാ സംവിധാനങ്ങൾ നീക്കം ചെയ്യുന്നത് പുനഃപരിശോധിക്കണമെന്നും കിഫ ആവശ്യപ്പെട്ടു. ഇടുക്കിയിലെ എം.പി.യും എം.എൽ.എമാരും വിഷയത്തിൽ വ്യക്തമായ നിലപാട് പ്രഖ്യാപിക്കണം. ജനങ്ങളുടെ ജീവനും സ്വത്തിനും സുരക്ഷ ഉറപ്പാക്കുന്ന തരത്തിൽ ഉത്തരവ് അടിയന്തരമായി പിൻവലിക്കണമെന്ന് കിഫ ആവശ്യപ്പെടുന്നു. ഉത്തരവ് പിൻവലിക്കാത്ത പക്ഷം ശക്തമായ ജനകീയ പ്രതിഷേധം സംഘടിപ്പിക്കുമെന്നും കിഫ മുന്നറിയിപ്പ് നൽകി.
