ദില്ലി: ഒടിടി പ്ലാറ്റ്ഫോമുകളില്‍ അശ്ലീലവും അധിക്ഷേപകരവുമായ ഉള്ളടക്കം വര്‍ദ്ധിക്കുന്നതിനെതിരെ കേന്ദ്രമന്ത്രി അനുരാഗ് താക്കൂര്‍. അസഭ്യ കണ്ടന്റുകള്‍ വര്‍ധിക്കുന്നുവെന്ന പരാതി ഗൗരവത്തോടെ കാണുന്നുവെന്ന് അനുരാഗ് താക്കൂര്‍ പറഞ്ഞു. നിയമത്തില്‍ മാറ്റം വരുത്തേണ്ടതുണ്ടെങ്കില്‍ നടപടിയെടുക്കും. ക്രിയേറ്റിവിറ്റിയുടെ പേരില്‍ എന്തും അനുവദിച്ചു നല്‍കാനാകില്ല. കര്‍ശന നടപടിയുണ്ടാകുമെന്നും അനുരാഗ് താക്കൂര്‍ മുന്നറിയിപ്പ് നല്‍കി.
ഇതുമായി ബന്ധപ്പെട്ട് ചട്ടങ്ങളില്‍ എന്തെങ്കിലും മാറ്റം വരുത്തേണ്ടതുണ്ടെങ്കില്‍ അതും മന്ത്രാലയം പരിഗണിക്കും. ഈ പ്ലാറ്റ്ഫോമുകള്‍ക്ക് സര്‍ഗ്ഗാത്മകതയ്ക്കുള്ള സ്വാതന്ത്ര്യമാണ് നല്‍കിയത്, അശ്ലീലവും അശ്ലീലതയുമല്ല. ആരെങ്കിലും ഒരു പരിധി കടക്കുമ്പോള്‍, സര്‍ഗ്ഗാത്മകതയുടെ പേരില്‍ ദുരുപയോഗം ചെയ്യുന്നത് അംഗീകരിക്കാനാവില്ല. ആവശ്യമായ നടപടികളില്‍ നിന്ന് സര്‍ക്കാര്‍ പിന്നോട്ടില്ല – താക്കൂര്‍ പറഞ്ഞു. സര്‍ക്കാര്‍ ഈ വിഷയം വളരെ ഗൗരവത്തോടെ തന്നെയാണ് കാണുന്നത്. പരിധി കടന്നുകൊണ്ട് ക്രിയേറ്റിവിറ്റി ദുരുപയോഗം ചെയ്യാന്‍ ആരെയും അനുവദിക്കില്ലെന്നും മന്ത്രി പറഞ്ഞു. പ്രാരംഭ തലത്തില്‍ നിര്‍മ്മാതാവ് പരാതികള്‍ കൈകാര്യം ചെയ്യണം എന്നതാണ് ഇതുവരെയുള്ള നടപടിക്രമം.
