റാന്നി: പാലത്തില് അമിത ഭാരവുമായെത്തിയ ടോറസ് ലോറികള് നിര്ത്തി ഇടുന്നത് പതിവാകുന്നതായി പരാതി. കീക്കൊഴൂര്-പേരൂര്ച്ചാല് കരകളെ ബന്ധിപ്പിക്കുന്ന പേരൂര്ച്ചാല് പാലത്തിലാണ് സംഭവം. വലിയ കാത്തിരിപ്പിനൊടുവില് പണി പൂര്ത്തീകരിച്ച പാലമാണിത്. തൂണുകള് മാത്രമായി കാലങ്ങളോളം നില്ക്കുകയും തൂണ് ചരിയുകയും ചെയ്ത ശേഷം പുനര്നിര്മ്മാണം നടത്തിയ പാലമാണിത്.
കിഴക്കന് മേഖലയില് നിന്നും അമിത അളവില് പാറ കയറ്റി എത്തുന്ന ലോറികളാണ് ഇത്തരത്തില് പാലത്തിന് ഭീഷണി ആകുന്നത്. പാലത്തില് വാഹനങ്ങള് നിര്ത്തി ഇടാന് പാടില്ലെന്ന നിയമം ലംഘിച്ചാണ് വാഹനങ്ങള് ഇടുന്നത്. സമീപത്തെ കടയില് ചായ കുടിച്ചു വരുന്നത് വരെ നിരവധി വാഹനങ്ങള് നിരത്തി ഇട്ടിരിക്കുകയാണ്. അധികൃതര് അടിയന്തിര നടപടി സ്വീകരിക്കണമെന്ന് നാട്ടുകാര് ആവശ്യമുന്നയിച്ചു.
