കണ്ണൂര്: പി ജയരാജനെതിരെ യുവമോര്ച്ച പോലീസില് പരാതി നല്കി. യുവമോര്ച്ച പ്രവര്ത്തകരെ മോര്ച്ചറിയാലാക്കുമെന്ന് വധഭീഷണി മുഴക്കിയതിനെ തുടര്ന്നാണ് പരാതി നല്കിയത്. ഭീഷണി രാഷ്ട്രീയ സംഘര്ഷത്തിന് വഴി വെക്കുമെന്ന് പരാതിയില് പറയുന്നു. എ എന് ഷംസീറിന് നേരെ കൈയ്യോങ്ങിയാല് യുവമോര്ച്ചക്കാരുടെ സ്ഥാനം മോര്ച്ചറിയിലായിരിക്കുമെന്നാണ് ജയരാജന് പ്രസംഗത്തില് ഭീഷണി മുഴക്കിയത്.
‘പോപ്പുലര് ഫ്രണ്ടുകാര് ജോസഫ് മാഷിന്റെ കൈവെട്ടിയതുപോലെയൊരു അനുഭവം ഷംസീറിന് ഉണ്ടാകാതിരിക്കില്ല’- എന്നായിരുന്നു കോ.ഗണേശിന്റെ പ്രസ്താവന. ഈ ഭീഷണിയൊന്നും ഈ നാട്ടില് നടപ്പില്ലെന്നും അതിശക്തമായ ചെറുത്ത് നില്പ്പുണ്ടാകുമെന്നും മറുപടിയായി പി.ജയരാജന് പറഞ്ഞു. അതേസമയം പി ജയരാജനെതിരെ കേസെടുക്കണമെന്ന് ബിജെപി സംസ്ഥാന അധ്യക്ഷന് കെ സുരേന്ദ്രന് ആവശ്യപ്പെട്ടു. പരസ്യമായി കൊലവിളി മുഴക്കുന്ന പി ജയരാജനെ ഖാദി ബോര്ഡിന്റെ വൈസ് ചെയര്മാന് സ്ഥാനത്ത് നിന്നും നീക്കാന് സര്ക്കാര് തയ്യാറാവണമെന്നും അദ്ദേഹം പറഞ്ഞു. ഇതിന് മുമ്പും പലരെയും മോര്ച്ചറിയിലേക്ക് അയച്ച നേതാവാണ് പി ജയരാജനെന്ന് അദ്ദേഹം ആരോപിച്ചു.
