പത്തനംതിട്ട : ചേരിക്കല്‍ ഗവ. ഐ.ടി.ഐ ജങ്ഷനിലെ ചെറിയ സ്റ്റേഷനറി കടക്കു മുന്നില്‍ 13ാം നമ്പര്‍ സ്റ്റേറ്റ് കാര്‍ നിര്‍ത്തിയത് കണ്ട നാട്ടുകാര്‍ ഞെട്ടലില്‍, ആര്‍ക്കും ഒന്നും മനസ്സിലായില്ല. കാറില്‍നിന്ന് ഇറങ്ങി കടയിലേക്ക് കൃഷിമന്ത്രി പി. പ്രസാദ് നടന്നപ്പോള്‍ നാട്ടുകാര്‍ക്ക് ആകാംക്ഷ.
കടയിലെത്തിയ മന്ത്രി വിളിച്ചു ഖദീജേ… പേരെടുത്തു വിളിച്ചപ്പോഴും നാട്ടുകാര്‍ക്കും കൂടെ എത്തിയവര്‍ക്കും കാര്യം മനസ്സിലായില്ല. കടക്കുള്ളില്‍നിന്ന് ഖദീജ പുറത്തേക്കിറങ്ങി മന്ത്രിയുടെ അടുത്തെത്തി. തന്റെ അയല്‍വാസിയും സഹപാഠിയുമാണ് ഖദീജയെന്ന് മന്ത്രി പരിചയപ്പെടുത്തിയപ്പോഴാണ് എല്ലാവര്‍ക്കും കാര്യം പിടികിട്ടിയത്. കടയില്‍ തൂക്കിയിട്ടിരുന്ന പഴക്കുലയില്‍നിന്ന് ഒരു പഴമെടുത്ത് കഴിച്ച്‌ ബാല്യകാല സ്മരണകള്‍ അദ്ദേഹം പങ്കുവെച്ചു. നിസ്സാര കാര്യത്തിനുപോലും പിണങ്ങുന്ന സ്വഭാവമാണ് ഖദീജയുടേതെന്ന് നര്‍മം പറഞ്ഞ മന്ത്രി, ഖദീജയുടെ കുടുംബത്തിലെ എല്ലാവരുടെയും ക്ഷേമാന്വേഷണം നടത്തിയശേഷമാണ് മടങ്ങിയത്.
ഇത്രയും വലിയ പദവിയിലെത്തിയിട്ടും സാധാരണക്കാരിയായ തന്റെ കടയില്‍ മന്ത്രി വന്നത് ഖദീജക്ക് ആദ്യം വിശ്വസിക്കാനായില്ല. കടയിലെത്തി തന്നോട് സ്നേഹാന്വേഷണം നടത്താന്‍ മന്ത്രി സമയം കണ്ടെത്തിയത് സാധാരണ ജനങ്ങളോടുള്ള കരുതലാണെന്നാണ് ഖദീജയുടെ അഭിപ്രായം.
നൂറനാട് ആശാന്‍ കലുങ്കിലാണ് പി. പ്രസാദിന്റെ വീട്. സമീപത്തെ പാലവിളയില്‍ വീട്ടിലെ ഖദീജയും പ്രസാദും നൂറനാട് സി.ബി.എം ഹയര്‍ സെക്കന്‍ഡറി സ്കൂളിലാണ് പഠിച്ചത്. പന്തളം വില്ലേജ് ഫീല്‍ഡ് അസിസ്റ്റന്റ് അമ്മച്ചി വീട്ടില്‍ സലീം വിവാഹം കഴിച്ചതോടെയാണ് എച്ച്‌. ഖദീജ ചേരിക്കലെത്തിയത്.
