ലക്നൗ : ഉത്തര്പ്രദേശിലെ ലക്നൗവില് പബ്ജി ഗെയിം കളിക്കുന്നത് തടഞ്ഞ അമ്മയെ 16 വയസ്സുകാരന് വെടിവച്ചു കൊന്നു. തിങ്കളാഴ്ച പുലര്ച്ചെയാണ് സംഭവം. പിതാവിന്റെ ലൈസന്സുള്ള തോക്ക് ഉപയോഗിച്ചാണ് അമ്മക്കുനേരെ വെടിയുതിര്ത്തത്. തലയ്ക്ക് വെടിയേറ്റ അമ്മ ഉടന് മരിച്ചു. കുട്ടി ഗെയിമിന് അടിമയായിരുന്നെന്നും കളിക്കുന്നതില്നിന്ന് അമ്മ തടയാറുണ്ടായിരുന്നെന്നും പോലീസ് പറഞ്ഞു.
അമ്മയെ വെടിവച്ചു കൊലപ്പെടുത്തിയ ശേഷം ഈ വിവരം ആരോടും പറയരുതെന്ന് 9 വയസ്സുകാരിയായ സഹോദരിയെ ഭീഷണിപ്പെടുത്തി. അതിന് ശേഷം മൃതദേഹം ഒളിപ്പിച്ചു. മൃതദേഹത്തില് നിന്നും വരുന്ന ദുര്ഗന്ധം വരാതിരിക്കാനായി കുട്ടി റൂം ഫ്രഷ്നര് ഉപയോഗിച്ചതായും പോലീസ് പറഞ്ഞു. ജോലിക്കായി വീട്ടിലെത്തിയ ഇലക്ട്രീഷ്യനാണ് അമ്മയെ വെടിവച്ചുകൊന്നതെന്നാണ് ആദ്യം പിതാവിനോടും പോലീസിനോടും പറഞ്ഞത്. കുട്ടിയെ കസ്റ്റഡിയിലെടുത്തതായും കൂടുതല് അന്വേഷണം നടക്കുന്നുവെന്നും പോലീസ് അറിയിച്ചു.
