ആലപ്പുഴ : സംസ്ഥാനത്ത് നെല്ല് സംഭരണം ഇന്ന് മുതല് വീണ്ടും ആരംഭിക്കും. മൂന്ന് മാസത്തിനകം മില്ലുടമകള് ഉന്നയിച്ച പ്രശ്നങ്ങള്ക്ക് പരിഹാരമുണ്ടാക്കാമെന്ന ഭക്ഷ്യമന്ത്രിയുടെ ഉറപ്പിനെ തുടര്ന്ന് രണ്ടാഴ്ചയായി മില്ലുടമകള് നടത്തി വന്ന സമരം ഇന്നലെ അവസാനിപ്പിച്ചു. അമ്പത്തിനാലോളം മില്ലുടമകള് രണ്ടാഴ്ചയായി നെല്ല് സംഭരിക്കാതെ നടത്തി വന്ന സമരമാണ് ഇന്നലെ അവസാനിപ്പിച്ചത്. നെല്ലെടുക്കാന് മില്ലുടമകള് വരുമെന്ന പ്രതീക്ഷയില് കുട്ടനാട്ടിലടക്കം നെല്ല് കൊയ്ത് പാടത്ത് കൂട്ടിയ കര്ഷകര്ക്ക് ഇതോടെ ആശ്വാസമായി.
കര്ഷകര് പ്രതിഷേധം കടുപ്പിച്ചതിന് പിന്നാലെ ഇന്നലെ ഭക്ഷ്യമന്ത്രി കൊച്ചിയില് മില്ലുടമകളുമായി ചര്ച്ച നടത്തിയാണ് പ്രശ്നത്തിന് താല്ക്കാലിക പരിഹാരമുണ്ടാക്കിയത്. 2018ലെ പ്രളയത്തില് സംഭരിച്ച നെല്ലിനുണ്ടായ നഷ്ടം നികത്താനുള്ള 15 കോടി രൂപ അനുവദിക്കുക. നെല്ല് സംസ്കരണത്തിനുള്ള കൈകാര്യ ചെലവ് 2 രൂപ 14 പൈസയില് നിന്ന് 2 രൂപ 86 പൈസ ആക്കി ഉയര്ത്തുക എന്നീ ആവശ്യങ്ങള് ഉന്നയിച്ചായിരുന്നു മില്ലുടമകളുടെ സമരം.
