തുർക്കി: പാകിസ്താനും അഫ്ഗാനിസ്ഥാനും തമ്മിൽ തുർക്കിയിലെ ഇസ്താംബൂളിൽ നടന്ന ചർച്ചകൾ പരാജയപ്പെട്ടു. പാകിസ്താന്റെ മണ്ണിൽ നിന്നും അഫ്ഗാനിസ്ഥാനിലേക്ക് ഡ്രോണുകൾ അയക്കാൻ അമേരിക്കയെ അനുവദിക്കുന്ന കരാർ നിലവിലുണ്ടെന്ന് പാകിസ്ഥാൻ സമ്മതിച്ചതാണ് ചർച്ചകൾ പരാജയപ്പെടാൻ കാരണമായത്. ഇതാദ്യമായാണ് അമേരിക്കയുമായി ഇത്തരമൊരു കരാർ ഉള്ളതായി പാകിസ്ഥാൻ പരസ്യമായി സമ്മതിക്കുന്നത്.ഈ കരാറിൽ നിന്നും പിന്മാറാനാകില്ലെന്ന് പാകിസ്ഥാൻ ചർച്ചയിൽ വാദിച്ചു. അമേരിക്കൻ ഡ്രോണുകൾ അഫ്ഗാന്റെ വ്യോമപരിധി ലംഘിക്കാൻ അനുവദിക്കില്ലെന്ന് പാകിസ്താൻ ഉറപ്പുനൽകണമെന്നാണ് താലിബൻ സർക്കാരിന്റെ ആവശ്യം. എന്നാൽ അമേരിക്കൻ ഡ്രോണുകളുടെ കാര്യത്തിലും ഇസ്ലാമിക് സ്റ്റേറ്റിന്റെ പ്രവർത്തനത്തിന്റെ കാര്യത്തിലും തങ്ങൾക്ക് നിയന്ത്രണമില്ലെന്നായിരുന്നു പാകിസ്താന്റെ വാദം.
