പാലക്കാട് : കടുത്ത ചൂട് പാലക്കാട്ടെ കര്ഷകര്ക്ക് സൃഷ്ടിച്ചത് വലിയ പ്രതിസന്ധി. കൊയ്തെടുത്ത നെല്ലിന്റെ ഈര്പ്പം വലിഞ്ഞതോടെ തൂക്കം കുറഞ്ഞു. ഒരേക്കര് ഭൂമിയില് കൃഷി ചെയ്ത കര്ഷകന് മൂവായിരം രൂപയിലധികമാണ് ഇതോടെ നഷ്ടമായത്. നാല്പതിനായിരം ഹെക്ടറിലാണ് പാലക്കാട് രണ്ടാം വിള കൃഷിയിറക്കിയത്. കൊയത്തു കഴിഞ്ഞ് സപ്ലൈക്കോ നെല്ല് സംഭരിച്ചപ്പോഴാണ് കര്ഷകര് കടുത്ത വേനലുണ്ടാക്കിയ പ്രതിസന്ധിയുടെ ചൂട് ശരിക്കുമറിഞ്ഞത്.
ഏക്കറിന് രണ്ടായിരത്തി ഇരുന്നൂറിലേറെ കിലോ നെല്ലുകിട്ടുമെന്നായിരുന്നു പ്രതീക്ഷ. പക്ഷേ കിട്ടിയത് രണ്ടായിരം കിലോയില് താഴെ മാത്രം. 17 ശതമാനം ഉണക്കാണു മില്ലുകള് ആവശ്യപ്പെടുന്നത്. ചൂടില് ഈര്പ്പം കുറഞ്ഞു ഉണക്ക് 14 ശതമാനമായി. ഒരു ചാക്കില് രണ്ട് കിലോയിലേറെ നെല്ല് അധികം നല്കേണ്ടി വന്നു. ഒന്നാം വിള മഴ കൊണ്ടുപോയ കര്ഷകര് ഇതോടെ ശരിക്കും ദുരതത്തിലായി.
