പല്ലശ്ശന: കേന്ദ്ര സര്‍ക്കാര്‍ തൊഴിലുറപ്പ് പദ്ധതിയെ അട്ടിമറിക്കുന്നു എന്നാരോപിച്ച്‌ പല്ലശ്ശന പഞ്ചായത്ത് ഭരണ സമിതി പ്രമേയം പാസാക്കി. ഒന്നാം വാര്‍ഡ് മെമ്പറും ആരോഗ്യ വിദ്യാഭ്യാസ സ്റ്റാന്റിംഗ് കമ്മിറ്റി ചെയര്‍പെഴ്സണും കൂടിയായ സജില അവതരിപ്പിച്ച പ്രമേയം 15ാം വാര്‍ഡ് മെമ്പര്‍ ഡി.മനുപ്രസാദ് പിന്താങ്ങുകയും പ്രമേയത്തിനുമേല്‍ തൊഴിലാളികളുടെയും പൊതുജനങ്ങളുടെയും ഒപ്പുകള്‍ ശേഖരിക്കുകയും ചെയ്തു. പല്ലശ്ശന ഗ്രാമപഞ്ചായത്ത് അങ്കണത്തില്‍ ചേര്‍ന്ന പ്രതിഷേധയോഗത്തില്‍ നൂറു കണക്കിന് തൊഴിലാളികള്‍ ഒത്തുകൂടി.
ഒപ്പ് ശേഖരണ സമ്മേളനം നെന്മാറ ബ്ലോക്ക് പഞ്ചായത്ത് പ്രസിഡന്റ് സി.ലീലാമണി ഉത്ഘാടനം ചെയ്തു. പല്ലശ്ശന ഗ്രാമ പഞ്ചായത്ത് വൈസ് പ്രസിഡന്റ് സി.അശോകന്‍ അധ്യക്ഷതവഹിച്ച ചടങ്ങില്‍, പഞ്ചായത്ത് പ്രസിഡന്റ് എല്‍. സായ്രാധ ഒപ്പുകള്‍ ശേഖരിച്ചത് ഏറ്റു വാങ്ങി. കെ.രമാധരന്‍, എം.സുധീര്‍,പി.ടി.ഉണ്ണികൃഷ്ണന്‍, വി.എം.കൃഷ്ണന്‍, എം.ലക്ഷ്മണന്‍ , പി.എസ്.രാമനാഥന്‍, കെ.കെ.യശോദ തുടങ്ങിയവര്‍ സംസാരിച്ചു.
