റാന്നി : സംസ്ഥാന ജൈവ വൈവിധ്യ ബോർഡ് വിഭാവനം ചെയ്ത പമ്പ പുനരുദ്ധാരണ പദ്ധതിയുടെ ഭാഗമായി നദീ തീരത്ത് വൃക്ഷ തൈകൾ നട്ടുപിടിപ്പിക്കുന്ന പദ്ധതിക്ക് തുടക്കമായി. റാന്നി അങ്ങാടി പഞ്ചായത്ത് തല ഉദ്ഘാടനം മുൻ എം.എൽഎയും ജൈവ വൈവിധ്യ ബോർഡ് ജില്ലാ ഉപദേശക സമിതി അംഗവുമായ രാജു എബ്രഹാം നിർവഹിച്ചു. ജൈവ വൈവിധ്യ ബോർഡിന് റീബിൽഡ് കേരള ഇനിഷ്യേറ്റീവ് പദ്ധതിയുടെ ഭാഗമായി ലഭിച്ച തുക ഉപയോഗിച്ച് പത്തനംതിട്ട ജില്ലാ പഞ്ചായത്ത് നേതൃത്വത്തിലാണ് പമ്പാ പുനരുദ്ധാരണ പദ്ധതി നടപ്പാക്കുന്നത്.
പദ്ധതിയുടെ ഭാഗമായി പതിനായിരം രാമച്ചതൈകളും നദീ തീരസംരക്ഷണത്തിന് അനുയോജ്യമായതുമായ 2000 വൃക്ഷ തൈകളും നട്ടുപിടിപ്പിക്കും. പഞ്ചായത്തിലെ തൊഴിൽ ഉറപ്പ് പദ്ധതി തൊഴിലാളികളുടെ സേവനം ഉപയോഗപ്പെടുത്തി ജനപങ്കാളിത്തത്തോടെയുള്ള തൈ സംരംക്ഷണ, പരിപാലനവും ലക്ഷ്യമിട്ടിട്ടുണ്ടെന്ന് രാജു എബ്രഹാം പറഞ്ഞു. വികസന കാര്യ സ്റ്റാൻഡിംഗ് കമ്മിറ്റി ചെയർമാൻ പി.എസ്. സതീഷ് കുമാർ അധ്യക്ഷതവഹിച്ചു.
ജില്ലാ പഞ്ചായ അംഗം ജെസി അലക്സ് , ബ്ളോക്ക് പഞ്ചായത്ത് അംഗം എം.എസ് സുജ, ഗ്രാമ പഞ്ചായത്ത് അംഗങ്ങളായ ബി.സുരേഷ്, ഷൈനി മാത്യൂസ്, ബിച്ചു ആൻഡ്രൂസ്, രാധാകൃഷ്ണൻ , ജലജ രാജേന്ദ്രൻ , ജെവിൻ കാവുങ്കൽ, രാഷ്ട്രീയ പാർട്ടി ഭാരവാഹികളായ നിസാംകുട്ടി, കെ. ജി രാജീവ്, സമദ് മേപ്രത്ത്, ശ്രീനി ശാസ്താംകോവിൽ, ബൈജു മാത്യു, എൻ.ആർ.ഇ.ജി.എസ് ഓവർസിയർ ഖമറുന്നീസ എന്നിവർ പ്രസംഗിച്ചു.
