കണ്ണൂര് : മനുഷ്യ ജീവനെടുക്കുന്ന ഏത് പാര്ട്ടിയാണെങ്കിലും അത് രാഷ്ട്രീയ പാര്ട്ടി അല്ലെന്ന് സിപിഐ നേതാവ് പന്ന്യന് രവീന്ദ്രന്. സിപിഐയിലേക്ക് വരുന്നവരെ ശരിപ്പെടുത്തിയേക്കാം എന്ന ധാരണ വിലപ്പോവില്ല, അടിക്ക് തിരിച്ചടി സിപിഐയിലില്ലെന്ന് പന്ന്യന് രവീന്ദ്രന് പറഞ്ഞു. 100 ശതമാനവും കൊലപാതകത്തെ എതിര്ക്കുന്ന പാര്ട്ടിയാണ് സിപിഐയെന്നും പന്ന്യന് അഭിപ്രായപ്പെട്ടു.
തളിപ്പറമ്പില് സിപിഎം മുന് ഏരിയ കമ്മിറ്റിയംഗം കോമത്ത് മുരളീധരനടക്കം സിപിഐയില് ചേര്ന്ന ശേഷം തളിപ്പറമ്പ് ടൗണ് സ്ക്വയറില് നടന്ന പരിപാടിയില് പ്രസംഗിക്കവെയാണ് അദ്ദേഹം ഇങ്ങനെ പറഞ്ഞത്. ജനങ്ങള് ഇഷ്ടപ്പെടുന്ന പാര്ട്ടി സിപിഐയാണ്. ഈ പാര്ട്ടിയിലേക്ക് വരുന്നവരെ ശരിപ്പെടുത്താമെന്ന് ധാരണ വേണ്ടെന്ന മുന്നറിയിപ്പും പന്ന്യന് നല്കി.
ഏകാധിപത്യവും അരാജകത്വവുമാണെന്ന് ആരോപിച്ച് കണ്ണൂരില് മാന്തംകുണ്ടില് 20 സിപിഎം പ്രവര്ത്തകര് സിപിഐയിലേക്ക് പോയത് ആഴ്ചകള്ക്ക് മുന്പാണ്. എറണാകുളം കാലടിയില് സിപിഎം വിട്ട് സിപിഐയില് ചേര്ന്ന രണ്ട് പ്രവര്ത്തകരെ വെട്ടി പരിക്കേല്പ്പിച്ചത് ഏതാനും ദിവസം മുന്പാണ്. ഇതിന് ശേഷം ആദ്യമായാണ് സംസ്ഥാന നേതാക്കളില് ഒരാള് ശക്തമായി ആക്രമണത്തിനെതിരെ പ്രതികരിക്കുന്നത്.
