ചെന്നൈ : തമിഴ്നാട്ടില് സമാന്തര ടെലിഫോണ് എക്സ്ചേഞ്ച് നടത്തിയ കേസില് മലയാളി യുവാവ് അറസ്റ്റില്. മലപ്പുറം സ്വദേശി നൗഫല് (35) ആണ് പിടിയിലായത്.ഇയാളെ കോടതി റിമാന്ഡ് ചെയ്തു. മുഖ്യപ്രതി അനീഷ് ഉള്പ്പെടെ രണ്ട് മലയാളികളെ കൂടി പോലീസ് അന്വേഷിക്കുന്നുണ്ട്. രാജ്യാന്തര കാളുകള് ലോക്കല് കാളുകളാക്കി മാറ്റിയാണ് തട്ടിപ്പ് നടത്തുന്നത്.
രണ്ടാഴ്ചക്കിടെ 72 ലാന്ഡ്ലൈന് കണക്ഷനുകളില് നിന്ന് 10,000 മുതല് 15,000 വരെ കാളുകള് വന്നതായി ബി.എസ്.എന്.എല് അധികൃതര് കണ്ടെത്തിയിരുന്നു. ചെന്നൈ ഈസ്റ്റ് കോസ്റ്റ് റോഡിലെ കാനത്തൂര് നൈനാര് കുപ്പം പ്രദേശത്തെ വാടകവീട്ടിലാണ് സമാന്തര എക്സ്ചേഞ്ച് പ്രവര്ത്തിച്ചിരുന്നത്. ബി.എസ്.എന്.എല് അധികൃതരും പോലീസും നടത്തിയ റെയ്ഡില് ഏഴ് സിം ബോക്സുകള് കണ്ടെടുത്തു. ഓരോ ബോക്സിലും ഒരേസമയം 32 സിം കാര്ഡുകള് വരെ പ്രവര്ത്തിപ്പിക്കാനാവും. വീടിന് 7500 രൂപയാണ് വാടക നല്കിയത്.
ബി.എസ്.എന്.എല്, എയര്ടെല്, ജിയോ തുടങ്ങിയ കമ്പനികളെ കബളിപ്പിച്ച് രാജ്യാന്തര ഫോണ് കാളുകള് ലോക്കല് കാളുകളാക്കി മാറ്റി വരുമാന നഷ്ടമുണ്ടാക്കിയതിനാണ് കേസ്. ഇതിനായി 224 ഉപഭോക്താക്കളുടെ പേരില് വ്യാജ സിം കാര്ഡുകള് വാങ്ങി. ഇവ പ്രത്യേക ഉപകരണങ്ങളുമായി ബന്ധിപ്പിച്ച് നെറ്റ്വര്ക്ക് ഉണ്ടാക്കി വ്യാജ നമ്പറുകള് രജിസ്റ്റര് ചെയ്യുകയായിരുന്നു.
എല്ലാ നമ്പറുകളും വ്യാജ തിരിച്ചറിയല് കാര്ഡുകള് ഉപയോഗിച്ചാണ് വാങ്ങിയത്. വിദേശത്തു നിന്നുള്ള പ്രത്യേക സോഫ്റ്റ്വെയര് ഉപയോഗിച്ച് വോയ്സ് ഓഫ് ഇന്റര്നെറ്റ് പ്രോട്ടോകോള് കാളുകള് ചെയ്യുന്നതിനാല് സമാന്തര എക്സ്ചേഞ്ച് മുഖേന സംസാരിക്കുന്നവരുടെ വിവരങ്ങള് നെറ്റ്വര്ക്ക് കമ്പനികള്ക്ക് ലഭ്യമാവാറില്ല. പ്രതികള് ദേശവിരുദ്ധ പ്രവര്ത്തനങ്ങളില് ഏര്പ്പെട്ടിട്ടുണ്ടോയെന്നും പോലീസ് അന്വേഷിക്കുന്നുണ്ട്.
