പാലക്കാട് : 1989-ല് ബീജിംഗിലെ ടിയാനന്മെന് സ്ക്വയറില് വിദ്യാര്ത്ഥികളുടെ നേതൃത്വത്തില് നടന്ന പ്രകടനങ്ങളും അതിനെ അടിച്ചമര്ത്താന് ചൈനീസ് ഭരണകൂടം നടത്തിയ കൂട്ടക്കൊലയുടേയും ഓര്മ്മകളുടെ മുപ്പത്തിരണ്ട് വര്ഷം കടന്നു പോകുകയാണ്. ഈ അവസരത്തില് ടിയാനന്മെന് സ്ക്വയര് കൂട്ടക്കൊലയെയും ഇന്ത്യയിലെ കമ്യുണിസ്റ്റുകാരെക്കുറിച്ചും വിടി ബല്റാം പങ്കുവച്ച കുറിപ്പ് ശ്രദ്ധനേടുന്നു.
ചരിത്രത്തില് സമാനതകളില്ലാത്ത നിഷ്ഠൂരതയാണ് ചൈനയിലെ കമ്മ്യൂണിസ്റ്റ് ഭരണകൂടം ജനാധിപത്യത്തിനായി വാദിച്ച സ്വന്തം പൗരന്മാരായ വിദ്യാര്ത്ഥികള്ക്ക് നേരെ നടത്തിയതെന്ന് വിടി ബല്റാം പറയുന്നു. എസ്എഫ്ഐ എന്നത് എന്നും കമ്മ്യൂണിസ്റ്റ് ക്യാപ്റ്റന്മാരുടെ നെറികേടുകള് ന്യായീകരിക്കാന് മാത്രം വിധിക്കപ്പെട്ട പടുജന്മങ്ങളാണെന്നും വിടി ബല്റാം സോഷ്യല് മീഡിയ കുറിപ്പില് പറയുന്നു.
കുറിപ്പ് പൂര്ണ്ണ രൂപം,
കമ്മ്യൂണിസമെന്നത് എന്തോ മാനവികതയുടെ പ്രത്യയശാസ്ത്രമാണെന്ന തെറ്റിദ്ധാരണ ഇപ്പോഴും വച്ചുപുലര്ത്തുന്ന നിഷ്ക്കളങ്കര് ഈ വീഡിയോ നിര്ബ്ബന്ധമായും കാണണം. ചരിത്രത്തില് സമാനതകളില്ലാത്ത നിഷ്ഠൂരതയാണ് ചൈനയിലെ കമ്മ്യൂണിസ്റ്റ് ഭരണകൂടം ജനധിപത്യത്തിനായി വാദിച്ച സ്വന്തം പൗരന്മാരായ വിദ്യാര്ത്ഥികള്ക്ക് നേരെ നടത്തിയത്. പതിനായിരക്കണക്കിന് വിദ്യാര്ത്ഥികളെയാണ് അന്ന് ടാങ്കുകള് കയറ്റി ചതച്ചരച്ചും യന്ത്രത്തോക്കുകള് കൊണ്ട് വെടിവെച്ചു വീഴ്ത്തിയും ചൈനീസ് പട്ടാളം കശാപ്പു ചെയ്തത്.
എസ്എഫ്ഐ എന്നത് എന്നും കമ്മ്യൂണിസ്റ്റ് കേപ്റ്റന്മാരുടെ നെറികേടുകള് ന്യായീകരിക്കാന് മാത്രം വിധിക്കപ്പെട്ട പടുജന്മങ്ങളാണെന്നും സീതാറാം യെച്ചൂരി എന്ന അഭിനവ ‘ജനാധിപത്യവാദി’യുടെ തനിസ്വരൂപം എന്താണെന്നും തുറന്നുപറയുന്ന ഒരു പരിപാടി ഒരു മലയാള മാധ്യമ പ്രവര്ത്തകനില് നിന്നുണ്ടായതില് അത്ഭുതവും സന്തോഷവുമുണ്ട്. ബാബു രാമചന്ദ്രന് അക്കാര്യത്തില് അഭിനന്ദനങ്ങള്.
