പാലക്കാട്: ലോക്ക് ഡൗണിന് ശേഷം വീണ്ടും ഓടിത്തുടങ്ങുമ്പോള് ലാഭകരമല്ലാത്ത ട്രെയിനുകള് പുനഃരാരംഭിക്കില്ല. അത്യാവശ്യമായ യാത്രാവണ്ടികള് മാത്രം ഓടിക്കാനും അധികം കിട്ടുന്ന സമയം ചരക്ക് ട്രെയിനുകള്ക്ക് നല്കാനുമാണ് റെയില്വേയുടെ നീക്കം.
വളരെ ഹ്രസ്വവും ഏറെ ദീര്ഘവുമായ ട്രെയിനുകളെ നിരുത്സാഹപ്പെടുത്തും. ആളുകള് ഹ്രസ്വയാത്രയ്ക്ക് ബസും ദീര്ഘയാത്രയ്ക്ക് വിമാനവുമാണ് ആശ്രയിക്കുന്നത്. ഒരു രാത്രിയോ പകലോ നീളുന്ന ഇന്റര്സിറ്റി എക്സ് പ്രസ്സ് ട്രെയിനുകള്ക്കായിരിക്കും ഇനി മുന്ഗണന നല്കുക. ലോക്ക്ഡൗണ് കാലത്ത് ട്രെയിന് ഓട്ടം നിര്ത്തിയപ്പോള് റെയില്വേ നടത്തിയ പഠനത്തിലാണ് ചരക്ക് കടത്തിന് പ്രാമുഖ്യം നല്കാന് നിര്ദേശമുള്ളത്. തിരക്കുള്ള സമയത്ത് യാത്രാ നിരക്ക് ഉയര്ന്ന സുവിധ സ്പെഷ്യല് ഓടിക്കും. യാത്രാ ട്രെയിനുകള് കുറയുമ്പോള് നഷ്ടം കുറയുമെന്നും ഇതുവരെ ചരക്ക് കടത്തിന്റെ നിരക്ക് കുറക്കാമെന്നും വിലയിരുത്തപ്പെടുന്നു.
മാത്രമല്ല ഗുഡ്സ് ട്രെയിനുകള്ക്ക് സമയക്ലിപ്തത പാലിക്കാനും സാധിക്കും. മരുന്നുകളും ഭക്ഷണ പദാര്ഥങ്ങളും ട്രെയിനില് തന്നെ രാജ്യം മുഴുവന് എത്തിക്കാനാവും. ഇത് സാമ്പത്തികമായി വലിയ നേട്ടമുണ്ടാക്കുമെന്നും റെയില്വേ കണക്ക് കൂട്ടുന്നു. റിപ്പോര്ട്ട് നടപ്പിലാക്കിയാല് പാസഞ്ചര് ട്രെയിനുകളില് ചിലത് ഓട്ടം നിര്ത്തിയേക്കും. കായംകുളം – എറണാകുളം, തൃശൂര് – ഗുരുവായൂര് പാസഞ്ചറുകള് പോലുള്ളവ വന് നഷ്ടത്തിലാണ്.
