പത്തനംതിട്ട : കാല് വഴുതി കിണറ്റില് വീണു കിടന്നിരുന്ന വൃദ്ധ മാതാവിന് പത്തനംതിട്ട ഫയര് ഫോഴ്സ് ഉദ്യോഗസ്ഥര് രക്ഷകരായി. കോഴഞ്ചേരി തെക്കേമലയില് ആയിരുന്നു സംഭവം നടന്നത്. തെക്കേമല പാണാംപറമ്പില് രഞ്ജി വര്ഗീസിന്റെ വീട്ടിലെ വൃദ്ധ മാതാവ് റോസമ്മ വര്ഗീസ് (78) ആണ് കാല് വഴുതി കിണറ്റില് വീണത്. പുലര്ച്ചെയാണ് സംഭവം എന്ന് കരുതുന്നു. രാവിലെ എഴുമണിയോടെ അയല്വാസി കിണറ്റില് നിന്നും ശബ്ദം കേട്ട് നോക്കുമ്പോഴാണ് റോസമ്മ വര്ഗീസ് വെള്ളത്തില് വീണുകിടക്കുന്നത് കണ്ടത്. അന്പത് അടിയോളം താഴ്ചയുള്ള കിണറ്റില് വീണ മാതാവിന് രക്ഷപെടാന് കിണറ്റിലേക്ക് കയര് ഇട്ട് കൊടുക്കുകയും ഇവര് കയറില് പിടിച്ച് വെളത്തിലേക്ക് താഴ്ന്നുപോകാതെ നിലയുറപ്പിക്കുകയുമായിരുന്നു.
പിന്നീട് പത്തനംതിട്ട ഫയര് ഫോഴ്സ് സ്ഥലത്തെത്തി വല ഉപയോഗിച്ച് ഇവരെ പുറത്തെടുക്കുകയായിരുന്നു. നല്ല വഴുക്കലുള്ള കിണറായതിനാലും വലിയ താഴ്ചയുള്ളതിനാലും രക്ഷാ പ്രവര്ത്തനം ഏറെ ദുഷ്കരമായിരുന്നു. കിണറിന്റെ കരയില് ചവിട്ടി നില്ക്കാന് പോലും സാധിക്കാത്ത വഴുക്കലുണ്ടായിരുന്നതിനാല് ഏറെ പണിപ്പെട്ടാണ് അമ്മയെ പുറത്തെടുത്തത്. വലിയ പരിക്കുകള് ഇല്ലാതെ വൃദ്ധമാതാവ് രക്ഷപെട്ടതായി ഉദ്യോഗസ്ഥര് അറിയിച്ചു. പത്തനംതിട്ട ഫയര് ഫോഴ്സ് സ്റ്റേഷന് ഓഫീസര് വിനോദ് കുമാറിന്റെ നേതൃത്വത്തില് ഉദ്യോഗസ്ഥരായ അമല്ചന്ദ്, വിനു കൃഷ്ണന്, അസീം, നൗഷാദ്, അനില് കുമാര്, ഡേവിഡ് എന്നിവര് ചേര്ന്നാണ് രക്ഷാ പ്രവര്ത്തനം നടത്തിയത്.
