കോന്നി : വീര്യം കുറഞ്ഞ മദ്യം വില്പന നടത്തിയ കുട്ടീസ് ബാര് എക്സൈസ് അടപ്പിച്ചു. മദ്യത്തിന്റെ വീര്യം സംബന്ധിച്ച് നിരവധി പരാതികള് ഉയര്ന്ന സാഹചര്യത്തില് എക്സൈസ് ഇന്സ്പെക്ടര് ഏഴ് മാസം മുമ്പ് ബാറിലെത്തി പരിശോധന നടത്തി ശേഖരിച്ച മദ്യത്തിന്റെ പരിശോധനാ ഫലം വന്നതിനെ തുടര്ന്നാണ് നടപടി.
ലാബ് പരിശോധനയില് മദ്യത്തിന് വേണ്ടവീര്യം ഇല്ലന്നു കണ്ടെത്തി. വീര്യം വോളിയം ബൈ വോളിയം 42.86 ശതമാനം വേണ്ടയിടത്ത് 33 ശതമാനം മാത്രമാണ് ഉണ്ടായിരുന്നതത്രെ. പരിശോധനാ ഫലം വന്നതിനെ തുടര്ന്ന് പത്തനംതിട്ട എക്സൈസ് സിഐയുടെ നേതൃത്വത്തിലുള്ള സംഘം ഇവിടെയെത്തി നടപടിക്രമങ്ങള് പാലിച്ച ശേഷമാണ് ബാര് അടച്ചത്. ബാര് ലൈസന്സ് താല്ക്കാലികമായി സസ്പെന്ഡ് ചെയ്തിട്ടുണ്ട് . കൂടാതെ പിഴയും അടയ്ക്കേണ്ടി വരും.
നിലവില് വെബ് ക്യൂ പ്രകാരം രാവിലെ 9 മുതല് വൈകിട്ട് 5 വരെ മദ്യം പാഴ്സല് നല്കി വരികയായിരുന്നു. ബാര് തുറക്കുന്നതു വരെ മദ്യത്തിനായി കോന്നിക്കാര്ക്ക് കൂടല്, പത്തനംതിട്ട എന്നിവിടങ്ങളിലെ ബിവറേജ് ഔട്ട് ലെറ്റുകളെ ആശ്രയിക്കേണ്ടി വരും.
