പത്തനംതിട്ട : പത്തനംതിട്ട നഗരസഭാ ബസ് സ്റ്റാന്റില് മഴക്കാലത്ത് വെള്ളം കെട്ടിക്കിടക്കുന്നത് യാത്രക്കാര്ക്ക് ബുദ്ധിമുട്ട് സൃഷ്ടിക്കുന്നു. യാര്ഡിനുള്ളിലായാണ് വെള്ളം കിടക്കുന്നത്. ഈ ഭാഗം താഴ്ന്ന് കിടക്കുന്നതിനാല് മഴപെയ്താല് വെള്ളം കെട്ടിക്കിടക്കുന്നത് പതിവാണ്. വെള്ളം ഒഴുകി പോകാനും ഇവിടെ സംവിധാനമില്ല. ഈ ഭാഗത്ത് ഓട ഇല്ലാത്തതാണ് പ്രധാന കാരണം. കൂടാതെ ഒരു വശം ഉയര്ന്നു നില്ക്കുന്നതിനാല് ഈ ഭാഗത്ത് കൂടിയും മഴവെള്ളം പുറത്തേക്ക് ഒഴുകില്ല. സ്റ്റാന്റില് മാസങ്ങളായി കെട്ടിക്കിടക്കുന്ന വെള്ളം ഒഴുകി പോകാന് കഴിയാതെ വന്നതോടെ ഇലകളും മറ്റും അഴുകി ദുര്ഗന്ധവും വമിച്ച് തുടങ്ങി.
ബസുകള് കയറിയിറങ്ങി പോകുന്നതും ഈ വെള്ളക്കെട്ടില് കൂടി തന്നെയാണ്. ഉയര്ന്നു കിടക്കുന്ന ഭാഗത്ത് കോണ്ക്രീറ്റ് പൊട്ടിച്ച് മാറ്റി ഈ ഭാഗത്ത് പൈപ്പ് സ്ഥാപിച്ച് കെട്ടികിടക്കുന്ന മലിനജലം പുറത്തേക്ക് ഒഴുക്കി കളയണം എന്നാണ് യാത്രക്കാരുടെ ആവശ്യം. അല്ലെങ്കില് വരും ദിവസങ്ങളില് മഴ തുടര്ന്നാല് ദുര്ഗന്ധം കൂടുതല് രൂക്ഷമാകും.
