റാന്നി : ശബരിമല റൂട്ടിൽ പെരുനാട് കഴിഞ്ഞാൽ എ.ടി.എം. സൗകര്യം ഇല്ലാത്തത് തീർഥാടകർക്കും സ്ഥിരം താമസക്കാർക്കും ബുദ്ധിമുട്ടാകുന്നു. പമ്പയിലാണ് എ.ടി.എം. കൗണ്ടർ ഉള്ളത്. പെരുനാട്ടിൽനിന്ന് 49 കിലോമീറ്റർ അകലെയാണ് പമ്പ
ളാഹ, അട്ടത്തോട്, നിലയ്ക്കൽ എന്നിവിടങ്ങൾ കടന്നാണ് പമ്പയിൽ എത്തുന്നത്. ളാഹയിലും അട്ടത്തോട്ടിലും സ്ഥിരതാമസക്കാരുണ്ട്. അട്ടത്തോട്ടിൽ ഗിരിവർഗ കോളനിയിൽ സ്ഥിരം കടകളുണ്ട്. ഈ ഭാഗത്ത് എ.ടി.എം. തുടങ്ങിയാൽ സൗകര്യപ്രദമാകും. എസ്.ബി.ഐ. സന്നിധാനത്തും പമ്പയിലും എ.ടി.എം. സംവിധാനങ്ങൾ ഏർപ്പാടാക്കിയിട്ടുണ്ട്. ധനലക്ഷ്മി ബാങ്കിലും എ.ടി.എം. സൗകര്യമുണ്ട്. ശബരിമല സീസൺകാലത്ത് നിലയ്ക്കൽ ക്യാമ്പ് സ്ഥലത്ത് താത്കാലികമായി കൗണ്ടർ പ്രവർത്തിക്കുന്നുണ്ട്. എന്നാൽ, മാസപൂജകൾക്ക് എത്തുന്ന തീർഥാടകരാണ് ബുദ്ധിമുട്ടുന്നത്.
പമ്പയിലെ എ.ടി.എമ്മുകളാകട്ടെ ഇക്കാലത്ത് പ്രവർത്തിക്കുമെന്നതിന് ഉറപ്പില്ല. അട്ടത്തോട്ടും നിലയ്ക്കലും താമസിക്കുന്നവർക്ക് പണമിടപാടുകൾക്ക് പെരുനാട്ടിലെ ബാങ്കിലോ എ.ടി.എമ്മിലോ പോകേണ്ട സ്ഥിതിയാണ്.