പത്തനംതിട്ട : വാഹനാപകടങ്ങളുടെ ആഘാതം കുറയ്ക്കുന്നതിന്റെ ഭാഗമായി ലോറികളുടെ പിന്നില് നിര്ബന്ധമായും ഉണ്ടാകേണ്ട മാന്സ്ഫീല്ഡ് ബാറുകള് ഘടിപ്പിക്കാത്ത വാഹനങ്ങളുടെ എണ്ണം ജില്ലയില് വ്യാപകമാകുന്നു. ഇത്തരം വാഹനങ്ങള് മോട്ടോര് വാഹന വകുപ്പിന്റെയും പോലീസിന്റെയും കണ്മുമ്പിലൂടെ തലങ്ങും വിലങ്ങും ചീറിപ്പാഞ്ഞിട്ടും നടപടിയെടുക്കുവാന് ഉദ്യോഗസ്ഥര് തയ്യാറാകുന്നില്ല. ലോറികളും ടിപ്പറുകളും തടഞ്ഞുനിര്ത്തി ഓവര്ലോഡിന് പിഴ ഈടാക്കുന്നവര് ഈ ഗുരുതരമായ നിയമലംഘനം കണ്ടില്ലെന്നു നടിക്കുകയാണ്. ലോറികള്, ടിപ്പറുകള് ഉള്പ്പെടെയുള്ള വലിയ ചരക്കുവാഹനങ്ങളുടെ പുറകില് മറ്റുവാഹനങ്ങള് ഇടിച്ച് അപകടങ്ങള് ഉണ്ടായാല് പുറകില് ഇടിക്കുന്ന വാഹനം വലിയ വാഹനത്തിന്റെ അടിയില് പോകാതെ തടഞ്ഞു നിര്ത്തുന്ന വലിയ കട്ടികൂടിയ പൈപ്പുകളാണ് മാന്സ്ഫീല്ഡ് ബാറുകള്. ഇരുചക്ര വാഹന യാത്രക്കാര്ക്കും ചെറിയ വാഹനങ്ങളില് യാത്ര ചെയ്യുന്നവര്ക്കും ഏറെ സുരക്ഷ നല്കുന്നതാണ് മാന്സ്ഫീല്ഡ് ബാറുകള്.
കേന്ദ്ര സര്ക്കാര് നിയമ പ്രകാരം രാജ്യത്തെ ഭാരം വഹിക്കുന്ന എല്ലാ വലിയ വാഹനങ്ങള്ക്കും ഇത്തരത്തില് സംവിധാനം ഉണ്ടായിരിക്കണം എന്നാണ് നിയമം. വാഹനങ്ങള്ക്ക് ഫിറ്റ്നസ് നല്കുമ്പോഴും ഇത് പരിശോധിക്കപ്പെടേണ്ടതുണ്ട്. എന്നാല് പത്തനംതിട്ട ജില്ലയില് സഞ്ചരിക്കുന്ന വാഹനങ്ങളില് പലതിനും ഇത്തരത്തില് മാന്സ്ഫീല്ഡ് ബാറുകള് ഘടിപ്പിച്ചിട്ടില്ല എന്ന് തന്നെ പറയാം. ഇത് വലിയ അപകടങ്ങള്ക്കും കാരണമായി തീരാറുണ്ട്. ജില്ലയില് ഒരു ദിവസം നിരവധി വാഹനാപകടങ്ങളാണ് നടക്കുന്നത്. ഈ വാഹനാപകടങ്ങളില് കൂടുതലും വലിയ വാഹനങ്ങള് മൂലമാണ് സംഭവിക്കുന്നതും. ഇരുചക്ര വാഹനങ്ങളാണ് ഇത്തരത്തില് അപകടങ്ങളില് പെടുന്നവയില് കൂടുതലും.
ജില്ലയിലെ പാറമടകളില് നിന്നും പാറ ഉത്പന്നങ്ങള് കയറ്റി പോകുന്ന വലിയ ടിപ്പര് ലോറികള് നിരവധിയാണ്. എന്നാല് ബഹുഭൂരിപക്ഷം ലോറികളിലും ഇത് കാണാനില്ല. ചീറിപ്പായുന്ന ലോറികള് പെട്ടന്ന് ബ്രേക്ക് ചെയ്യുമ്പോള് മാന്സ്ഫീല്ഡ് ബാറുകള് ഇല്ലാത്തത് വലിയ അപകടങ്ങള്ക്ക് കാരണമായി തീരുന്നുണ്ട്. മാന്സ്ഫീല്ഡ് ബാറുകള് ഇല്ലാത്ത വാഹനങ്ങള് മൂലം സംഭവിക്കുന്ന അപകടങ്ങളില് ജീവന് നഷ്ടമായവരും അനവധിയാണ്. 2004, 2005 വര്ഷങ്ങളിലാണ് രാജ്യത്തെ എല്ലാ ചരക്ക് വാഹനങ്ങളിലും മാന്സ്ഫീല്ഡ് ബാറുകള് നിര്ബന്ധമായും ഉണ്ടായിരിക്കണം എന്ന് നിയമം വന്നത് എങ്കിലും 2014 ലാണ് ഇത് പൂര്ണ്ണമായും പ്രാവര്ത്തികമാക്കിയത്.
