പത്തനാപുരം : ഇലയില് ചെറിയ കുപ്പി മദ്യം, മറ്റൊരു ഇലയില് നാരാങ്ങ കിഴിച്ച് ഇറക്കിയ മഞ്ഞച്ചരട് കെട്ടിയ ശൂലം. സമീപത്തായി മാലയിട്ട് തമിഴ് ദേവനായ ശപ്പാണി മുത്തയ്യയുടെ ചിത്രവും. പത്തനാപുരത്തെ സ്വകാര്യ ധനകാര്യ സ്ഥാപത്തില് നടന്ന മോഷണരീതി കണ്ട് ഞെട്ടിയിരിക്കുകയാണ് പോലീസ്. മുറിച്ച മുടിയും കുങ്കുമവും വിതറിയ നിലയിലാണ്. വാഴയില കിട്ടാത്തത് കൊണ്ട് പ്ലാസ്റ്റിക് വാഴയിലയിലായിരുന്നു പൂജകളും മറ്റും. മുപ്പത് ലക്ഷത്തോളം രൂപയുടെ സ്വര്ണ ഉരുപ്പടികളും പണവുമാണ് ലോക്കര് പൊളിച്ച് ഇവിടെ നിന്നും അപഹരിച്ചത്. പന്ത്രണ്ട് വര്ഷമായി ജനതാ ജംഗ്ഷനില് പ്രവര്ത്തിക്കുന്ന പത്തനാപുരം ബാങ്കേഴ്സ് എന്ന ധനകാര്യ സ്ഥാപനത്തിലാണ് മോഷണം നടന്നത്.
പത്തനാപുരം പിടവൂര് സ്വദേശി രാമചന്ദ്രന് നായരുടെ ഉടമസ്ഥതയിലുളള സ്ഥാപനത്തില് സി.സി.ടി.വി സ്ഥാപിച്ചട്ടില്ലാത്തതിനാല് സമീപത്തെ സി.സി.ടി.വി ദ്യശ്യങ്ങള് പരിശോധിച്ച് തുമ്പ് കണ്ടെത്താനുളള ശ്രമത്തിലാണ് പോലീസ്. വിരലടയാള വിദഗ്ദ്ധരും ഡോഗ് സ്വാഡും സ്ഥലത്തെത്തി പരിശോധന നടത്തി. തമിഴ് ദേവന് പൂജ ചെയ്ത ശേഷം നടന്ന മോഷണമായതിനാല് തിരിട്ട് ഗ്രാമത്തിലുളള അന്തര് സംസ്ഥാന സംഘമാണോ എന്ന സംശയത്തിലാണ് പോലീസ്. പുനലൂര് ഡി.വൈ.എസ്.പി വിനോദ് കുമാര്, അഞ്ചല് സി.ഐ ഗോപകുമാര് എസ്.ഐ അരുണ്കുമാര് എന്നിവരുടെ നേതൃത്ത്വത്തിലുളള സംഘം സ്ഥലത്തെത്തി പരിശോധന നടത്തി.
