കുടമാളൂര് : ചികിത്സയ്ക്കായി ആശുപത്രിയില് എത്തിയശേഷം കാണാതായ ആളെ റോഡരികില് അബോധാവസ്ഥയില് കണ്ടെത്തി. വൈക്കം സ്വദേശി സത്യനെയാണ് (60) റോഡരികില് വീണുകിടക്കുന്ന നിലയില് കണ്ടെത്തിയത്. മെഡിക്കല് കോളജ് ആശുപത്രിയിലെ ഗ്യാസ്ട്രോ എന്ട്രോളജി വിഭാഗത്തില് ബന്ധുക്കളോടൊപ്പമാണ് സത്യന് ചികിത്സയ്ക്ക് എത്തിയത്. ആശുപത്രി വിഭാഗത്തിനു സമീപം ബന്ധുക്കള്ക്കൊപ്പം ഇരുന്ന സത്യനെ പിന്നീട് കാണാതായി. ബന്ധുക്കള് ഗാന്ധിനഗര് പോലീസ് സ്റ്റേഷനിലും ആശുപത്രി പോലീസ് എയ്ഡ് പോസ്റ്റിലും അറിയിച്ചെങ്കിലും കണ്ടെത്താനായില്ല.
പിന്നീട് വാസുദേവപുരം അമ്പലത്തിനു സമീപം റോഡരികില് ഒരാള് കിടക്കുന്നതായി നാട്ടുകാര് കണ്ടു. തുടര്ന്ന് ലയണ്സ് റാഫിള് ചെയര്മാന് എം.പി.രമേഷ്കുമാറും നാട്ടുകാരും ചേര്ന്ന് ആശുപത്രിയില് കൊണ്ടുപോകാനുള്ള ശ്രമത്തിനിടെ സത്യനു ബോധം വീണ്ടുകിട്ടി. ഓറഞ്ചുനീരും ഭക്ഷണവും നല്കിയശേഷം അതുവഴി എത്തിയ സേവാഭാരതിയുടെ ആംബുലന്സില് ആശുപത്രിയില് എത്തിച്ചു.