കോഴഞ്ചേരി : കാട്ടിൽ നിന്ന് നാട്ടിലെത്തി ടൗണിലെ നിത്യ സന്ദർശകയായ പെൺമയില് വൈദ്യുതാഘാതമേറ്റു ചത്തു. കഴിഞ്ഞ ദിവസം കോഴഞ്ചേരി കോളേജ് റോഡിലാണ് സംഭവം. തറയിൽ നിന്ന് പറന്നുയരാൻ ശ്രമിക്കവെ കോളേജ് റോഡിലെ സ്വകാര്യ ആശുപത്രിക്ക് സമീപം സ്ഥാപിച്ചിരുന്ന ട്രാൻസ് ഫോർമ്മറിൽ തട്ടി അന്ത്യം സംഭവിക്കുകയായിരുന്നു. കണ്ടു നിന്നവർ ശുശ്രൂഷ നല്കി സംരക്ഷിക്കാൻ ശ്രമം നടത്തിയെങ്കിലും വിഫലമായി.
സമീപത്തെ ഓട്ടോ റിക്ഷാ ഡ്രൈവര്ന്മാർ അടക്കം നാട്ടുകാരുടെ കണ്ണു നനയിപ്പിച്ച ദൃശ്യമായിരുന്നു അത്. വിവരമറിയിച്ചതിനെ തുടർന്ന് റാന്നിയിൽ നിന്ന് വനപാലകരെത്തി പെൺമയിലിന്റെ ജഡം കൊണ്ടുപോയി. സ്ഥിരമായി കീഴുകരയിലും സമീപ പ്രദേശങ്ങളിലും ഈ മയിൽ എത്താറുണ്ടായിരുന്നുവെന്നും നാട്ടുകാർ നൽകുന്ന അരിമണികളും മറ്റു ഭക്ഷ്യ വസ്തുക്കളും ഭക്ഷിക്കുക പതിവായിരുന്നു എന്നും സമീപവാസികൾ പറഞ്ഞു.
