ഇരങ്ങാലക്കുട : കരുവന്നൂര് സഹകരണബാങ്കില് 219.33 കോടിയുടെ സാമ്പത്തിക ക്രമക്കേട് നടന്നുവെന്ന് മന്ത്രി വി.എന്.വാസവന് നിയമസഭയെ അറിയിച്ചു. സര്ക്കാര് നിയോഗിച്ച ഉന്നതതല സമിതിയുടെ റിപ്പോര്ട്ടിലാണ് ക്രമക്കേട് അക്കമിട്ട് നിരത്തിയത്. സഹകരണ ബാങ്കില് വായ്പാ വിതരണത്തില് 208. 08 കോടിയുടെയും പ്രതിമാസ നിക്ഷേപ പദ്ധതികളില് 9.42 കോടിയുടെയും വ്യാപാര പ്രവര്ത്തനങ്ങളില് 1.83 കോടിയുടെയും ക്രമക്കേടാണ് റിപ്പോര്ട്ടില് ചൂണ്ടിക്കാണിച്ചത്. പരാതി ഉയര്ന്നപ്പോള് സഹകരണ നിയമപ്രകാരം അന്വേഷണം നടത്തിയിരുന്നു. വായ്പ പലിശ ഉള്പ്പെടെ 102.55 കോടിയുടെയും വ്യാപാര സ്റ്റോക്കില് കുറവ് ഇനത്തില് 1.69 കോടിയുടെയും ക്രമക്കേട് നടന്നതായി അന്വേഷണത്തില് കണ്ടെത്തിയിരുന്നു. സഹകരണ ബാങ്ക് ഭരണസമിതിയെ നിയമത്തിലെ വകുപ്പ് 32 പ്രകാരം നീക്കം ചെയ്തു.
ഉന്നതതല സമിതിയുടെ ഇടക്കാല റിപ്പോര്ട്ടിന്റെ അടിസ്ഥാനത്തില് ക്രമക്കേട് കണ്ടെത്തുന്നതില് വീഴ്ച വരുത്തിയ ഉദ്യോഗസ്ഥര്ക്കെതിരെ സര്ക്കാര് വകുപ്പുതല അച്ചടക്ക നടപടി സ്വീകരിച്ചു. സഹകരണ വകുപ്പ്, ക്രൈം ബ്രാഞ്ച് എന്നിവര് നടത്തിയ അന്വേഷണത്തില് കുറ്റാരോപിതരായി കണ്ടെത്തിയവരുടെ സ്വത്ത് കണ്ടുകെട്ടുന്നതിനുള്ള നടപടി സ്വീകരിക്കണമെന്ന് സര്ക്കാര് നിര്ദേശം നല്കി.
കോട്ടയം ജില്ലയിലെ സഹകരണ ബാങ്കുകളില് അന്വേഷണം നടത്തിയപ്പോള് കാരാപ്പുഴ സര്വീസ് സഹകരണ ബാങ്കില് ഐ.എം.ബി.പിയില് അധികരിച്ച് വായ്പ നല്കിയതായി കണ്ടെത്തി. കുമാരനെല്ലൂര് സഹകരണ ബാങ്കില് കളക്ഷന് ഏജന്റ് നിക്ഷേപ പിരിവില് കൃത്രിമം കാണിച്ചതായും കണ്ടെത്തി. അയാളെ സര്വീസില്നിന്ന് പിരിച്ചുവിട്ടു. കണ്ടല സഹകരണബാങ്കില് ഭരണസമിതിയുടെയും ജീവനക്കാരുടെയും പ്രവര്ത്തനങ്ങളില് വീഴ്ച കണ്ടെത്തി. അതില് നടപടി സ്വീകരിക്കുമെന്നും മന്ത്രി മറുപടി നല്കി.
