റാന്നി : കോഴിക്കൂട്ടില്‍ കയറി കോഴിയെയും താറാവിനെയും വിഴുങ്ങിയ പെരുമ്പാമ്പിനെ പിടികൂടി. ഇന്നു രാവിലെ പെരുനാട് മുക്കം കാടുവാകുഴിയിൽ ഷാജൻ പി. ജോണിന്റെ വീട്ടുമുറ്റത്തെ കോഴിക്കൂട്ടിലാണ് പെരുമ്പാമ്പിനെ കണ്ടത്. വനംവകുപ്പ് ഉദ്യോഗസ്ഥരെ വിവരം അറിയിച്ചതിനെ തുടർന്ന് റാന്നി റാപ്പിഡ് റെസ്പോൺസ് ടീം അംഗങ്ങള്‍ സ്ഥലത്തെത്തി പെരുമ്പാമ്പിനെ പിടികൂടി.
മുക്കം , നാറാണംമൂഴി , അത്തിക്കയം മേഖലയിൽ പെരുമ്പാമ്പിൻറെ ശല്യം ഏറി വരികയാണ്. കഴിഞ്ഞ ദിവസം അത്തിക്കയം അറയ്ക്കമൺ മുല്ലശ്ശേരിൽ സഞ്ചുവിൻറെ വീട്ടിലെ രണ്ടു കോഴികളെ പെരുമ്പാമ്പ് പിടിച്ചിരുന്നു. റാപ്പിഡ് റെസ്പോൺസ് ടീം അന്ന് സ്ഥലത്തെത്തി തിരച്ചിൽ നടത്തിയെങ്കിലും പിടികൂടാനായില്ല. പിടികൂടിയ പെരുമ്പാമ്പിനെ ചാക്കിലാക്കിയ ശേഷം വനത്തില്‍ വിടുന്നതിനായി കൊണ്ട് പോയി.
