കൊച്ചി : കുരുമുളക് ക്വിന്റലിന് 400 രൂപ വില കുറഞ്ഞു. കൊച്ചി വിലയേക്കാള് കുറഞ്ഞ നിരക്ക് ഉത്തരേന്ത്യന് മാര്ക്കറ്റുകളില് കുരുമുളക് ലഭ്യമായതോടെയാണ് കൊച്ചിയില് ഉത്തരേന്ത്യന് ഡിമാന്ഡ് കുറഞ്ഞത്. ഇതോടെ കൊച്ചിയില് വ്യാപാരവും മാന്ദ്യത്തിലാണ്. കൊച്ചി ടെര്മിനല് വിപണിയില് കഴിഞ്ഞ വാരം 129 ടണ് കുരുമുളക് വില്പ്പനയ്ക്കെത്തി. രൂപയുടെ മൂല്യ തകര്ച്ച ഇറക്കുമതിക്ക് സാധ്യത കുറവാണ്. എങ്കിലും ശ്രീലങ്കയില്നിന്നുള്ള ഇറക്കുമതിക്ക് അയവില്ല.
രാജ്യാന്തര വിപണിയില് കയറ്റുമതിയില് മുന്നിട്ടുനില്ക്കുന്നത് വിയറ്റ്നാം ആണ്. ചൈനയാണ് കൂടുതലായും വിയറ്റ്നാം മുളക് വാങ്ങിയിരുന്നത്. ഇപ്പോള് വാങ്ങുന്നതിന്റെ തോത് കുറച്ചു. കഴിഞ്ഞ ജനുവരി മുതല് ഓഗസ്റ്റ് വരെയുള്ള കാലയളവില് 1,63,000 ടണ് കുരുമുളകാണു വിയറ്റ്നാം വിവിധ രാജ്യങ്ങളിലേക്ക് കയറ്റുമതി ചെയ്തത്. കയറ്റുമതി രാജ്യങ്ങളില് ഇന്ത്യയുടെ നിരക്കിനേക്കാള് 50 ശതമാനം കുറവാണ് വിയറ്റ്നാം മുളകിന്.
അമേരിക്കയിലേക്ക് 37,000 ടണ്, യു.എ.ഇയിലേക്ക് 12,800 ടണ്, ഇന്ത്യയിലേക്ക് 1,100 ടണ് കുരുമുളക് വിയറ്റ്നാം കയറ്റുമതി ചെയ്തു. ഇന്ത്യയില്നിന്ന് കയറ്റുമതിക്ക് ഇനിയും സാധ്യത തെളിഞ്ഞിട്ടില്ല. രാജ്യാന്തര വില ഇന്ത്യയുടെ നിരക്ക് ഒരുടണ് കുരുമുളകിന് 6,350, ശ്രീലങ്ക 5,000, ബ്രസീല് 3,000, വിയറ്റ്നാം 3,200, ഇന്തോനീഷ്യ 3,500 ഡോളര്. വാരാന്ത്യ വില കുരുമുളക് കൊച്ചി അണ്ഗാര്ബിള്ഡ് ക്വിന്റലിന് 49,500, ഗാര്ബിള്ഡ് 51,500, പുതിയ മുളക് 48,500 രൂപ.
