കോന്നി : സമസൃഷ്ടി ഭാവനയും സഹജീവി സ്നേഹവും സഹിഷ്ണുതയുമില്ലാത്ത മനുഷ്യൻ സാമൂഹ്യവിരുദ്ധനാണെന്ന് മലങ്കര ഓർത്തഡോക്സ് സഭ വലിയ തിരുമേനി ഡോ. കുര്യാക്കോസ് മാർ ക്ലിമ്മീസ്. ഹരിതാശ്രമം പാരിസ്ഥിതിക ദാർശനിക ഗുരുകുലത്തിന്റെ ആഭിമുഖ്യത്തിൽ തട്ടയിൽ ഒരിപ്പുറം നന്ദന ഫാമിൽ സംഘടിപ്പിച്ച അന്താരാഷ്ട്ര ജൈവ വൈവിദ്ധ്യ ദിനാചരണവും ജൈവ വൈവിദ്ധ്യ സംരക്ഷകൻ ചിക്കു നന്ദനയെ ആദരിക്കൽ ചടങ്ങും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഹരിതാശ്രമം പാരിസ്ഥിതിക ഗുരുകുലം ഡയറക്ടറും ഇക്കോ-ഫിലോസഫറുമായ ഡോ. ജിതേഷ്ജിയുടെ അദ്ധ്യക്ഷതയിൽ ചേർന്ന സമ്മേളനത്തിൽ പത്തനാപുരം ഗാന്ധിഭവൻ സ്ഥാപകൻ ഡോ. പുനലൂർ സോമരാജൻ മുഖ്യപ്രഭാഷണം നടത്തി.
ഡോ. അടൂർ രാജൻ, ജീവകാരുണ്യപ്രവർത്തക രേഖ സ്നേഹപ്പച്ച, പന്തളം തെക്കേക്കര ഗ്രാമപഞ്ചായത്ത് അംഗം എസ്. ശരത്, പന്തളം തെക്കേക്കര പഞ്ചായത്ത് മുൻ വൈസ് പ്രസിഡന്റ് ജേക്കബ് ജോർജ്, എസ്. പ്രശാന്ത് കുമാർ, ഡോ. വിൻസന്റ് ദാനിയൽ, ജൈവ കർഷകൻ ജോജി തോമസ് തെക്കേമല, കവയിത്രി മിനിത മിഖായേൽ, ഡോ. ദിവ്യ, ഡോ. സാന്ദ്ര, രാജേഷ് ഒരിപ്പുറം തുടങ്ങിയവർ പ്രസംഗിച്ചു.
