കോട്ടയം : വളര്ത്തുമൃഗങ്ങളെ വില്ക്കുന്ന സ്ഥാപനം കുത്തിത്തുറന്ന് പൂച്ചകളെ മോഷ്ടിച്ച കേസില് പ്രതി പിടിയില്. ഇടുക്കി കാര്കൂന്തല് സ്വദേശി കളത്തൂര് ലിജോ തങ്കച്ചനാണ് പിടിയിലായത്. പേര്ഷ്യന് ക്യാറ്റ് ഇനത്തില്പ്പെട്ട മൂന്ന് പൂച്ചകളെയാണ് ഇയാള് മോഷ്ടിച്ചത്. 27,000 രൂപയോളം വില വരുന്നതാണ് പൂച്ചകള്. മാര്ച്ച് 30ന് രാത്രി 10.45നാണ് പ്രതി പൂച്ചകളെ മോഷ്ടിച്ചത്. പച്ചത്തോട് പെറ്റ്സ് പാര്ക്ക് എന്ന സ്ഥാപനത്തില് നിന്നും പൂച്ചകളെ മോഷ്ടിച്ച്, മുണ്ടിനുള്ളിലാക്കി പുറത്ത് പോകുന്ന ദൃശ്യങ്ങള് സിസിടിവി ക്യാമറയില് പതിഞ്ഞിരുന്നു. തുടര്ന്ന് ഒരു മാസത്തെ സിസിടിവി ദൃശ്യങ്ങള് പരിശോധിച്ചപ്പോള്, ഇയാള് 24-ാം തീയതി ഭാര്യയോടും മക്കളോടുമൊപ്പമെത്തി ചെറിയ പട്ടിക്കുട്ടികളെ നല്കി മറ്റൊരു പട്ടിയെ വാങ്ങിയതായി കണ്ടെത്തി.
തുടര്ന്ന് പോലീസ് പ്രതിയ്ക്കായി തിരച്ചിലാരംഭിച്ചു. മോഷ്ടിച്ച മൂന്ന് പൂച്ചകളെയും പ്രതി ജോലി ചെയ്തിരുന്ന ഈരാറ്റുപേട്ടയിലുള്ള ഫാം ഹൗസില് നിന്നും കണ്ടെത്തി. മണിമല, കറുകച്ചാല് പോലീസ് സ്റ്റേഷനുകളില് വധശ്രമം, പോക്സോ കേസുകളില് പ്രതിയാണ് ഇയാളെന്നും പോലീസ് കണ്ടെത്തി. കൂടാതെ കറുകച്ചാലിലെ വധശ്രമ കേസില് പ്രതിയെ അഞ്ച് വര്ഷം ശിക്ഷിച്ചിരുന്നു. എസ്എച്ച്ഒ കെ.പി തോംസണ്, എസ്ഐ അഭിലാഷ്, മറ്റ് പോലീസ് ഉദ്യോഗസ്ഥരായ ബിജു കെ തോമസ്, ഷെറിന് സ്റ്റീഫന്, സി.രഞ്ജകിത്ത് എന്നിവര് ചേര്ന്നാണ് പ്രതിയെ പിടികൂടിയത്.
