കുന്നംകുളം : വാട്സാപ്പില്‍ ഗുഡ്മോണിങ് മെസേജിനൊപ്പം വന്ന നെല്‍ക്കതിര്‍ തോളിലേറ്റിയ സ്ത്രീയുടെ ചിത്രം ഫ്ളക്സില്‍ അച്ചടിച്ച സി.പി.ഐക്കാര്‍ വെട്ടിലായി. സി.പി.ഐ പ്രവര്‍ത്തകര്‍ക്കെതിരെ യുവതി പരാതി നല്‍കി. അനുമതിയില്ലാതെ തന്റെ ചിത്രം ഫ്ളക്സില്‍ അച്ചടിച്ചവര്‍ക്കെതിരെയാണ് യുവതി പരാതി നല്‍കിയിരിക്കുന്നത്. സംഭവം കൈവിട്ടുപോകുമെന്ന് മനസിലായതോടെ ഖേദം പ്രകടിപ്പിച്ച്‌ പാര്‍ട്ടിക്കാര്‍ തടിയൂരി.
സി.പി.ഐ കുന്നംകുളം ലോക്കല്‍ സമ്മേളനത്തിന് മുന്നോടിയായി റോഡരികില്‍ സ്ഥാപിച്ച ഫ്ളക്സ് ബോര്‍ഡില്‍ ആണ് യുവതിയുടെ ചിത്രം പ്രിന്റ്‌ ചെയ്ത് വന്നത്. എറണാകുളം സ്വദേശിയായ അശ്വതിയാണ് പാര്‍ട്ടി പ്രവര്‍ത്തകര്‍ക്കെതിരെ പരാതി നല്‍കിയിരിക്കുന്നത്. അനുമതിയില്ലാതെയാണ് പാര്‍ട്ടിക്കാര്‍ അശ്വതിയുടെ ചിത്രം ഉപയോഗിച്ചത്. സംഭവത്തില്‍ പാര്‍ട്ടിക്കാര്‍ യുവതിയോട് ക്ഷമാപണം നടത്തുകയും ചെയ്തു.
