കൊച്ചി: കവി കെ. സച്ചിദാനന്ദന്റെ ‘തുടർഭരണം വേണ്ട’ എന്ന നിലപാടിന് പരോക്ഷ മറുപടിയുമായി പ്രതിപക്ഷ നേതാവ് പിണറായി വിജയൻ. എം.കെ. സാനു മാസ്റ്ററുടെ ഒന്നാം ചരമവാർഷിക അനുസ്മരണ ചടങ്ങിൽ സംസാരിക്കവെയാണ് സാനു മാസ്റ്ററുടെ നിലപാടുകളെ ചൂണ്ടിക്കാട്ടി പിണറായി വിമർശനം ഉന്നയിച്ചത്. സാഹിത്യ അക്കാദമിയുടെ മുൻ ചെയർമാൻ കൂടിയായിരുന്ന സച്ചിദാനന്ദന്റെ പേര് നേരിട്ട് പരാമർശിക്കാതെയായിരുന്നു പിണറായിയുടെ പ്രതികരണം. ഇടതുപക്ഷത്തിൽ നിന്ന് ഇടതുപക്ഷത്തെ വിമർശിച്ച് സ്വീകാര്യത നേടാനോ, തുടർഭരണം അപകടമാണെന്ന പ്രചാരണം നടത്താനോ എം.കെ. സാനു ശ്രമിച്ചിട്ടില്ലെന്ന് അദ്ദേഹം പറഞ്ഞു. സ്വന്തം രാഷ്ട്രീയ നിലപാടിനെയും മൂല്യങ്ങളെയും ഉയർത്തിപ്പിടിച്ചാണ് സാനു മാസ്റ്റർ ജനമനസ്സുകളിൽ ഇടം നേടിയതെന്നും പിണറായി കൂട്ടിച്ചേർത്തു.
“ഇടതുപക്ഷത്തെ ഇകഴ്ത്തിക്കാട്ടി സ്വന്തം യശസ്സ് വർധിപ്പിക്കാൻ സാനു മാഷ് ഒരിക്കലും ശ്രമിച്ചില്ല. ജനങ്ങളുടെ മനസ്സിൽ അദ്ദേഹം നേടിയ സ്ഥാനം അതുകൊണ്ടാണ്. ആ അംഗീകാരം ഇല്ലാത്തവരാണ് ‘ഞാനിവിടെയുണ്ട്’ എന്ന് തെളിയിക്കാൻ ഇത്തരം നിലപാടുകൾ സ്വീകരിക്കുന്നത്,” എന്നായിരുന്നു പിണറായിയുടെ വിമർശനം. നിയമസഭാ തിരഞ്ഞെടുപ്പിന് മുന്നോടിയായി കേരളത്തിൽ മാറിമാറിയുള്ള ഭരണമാണ് നല്ലതെന്നും ഇടതുമുന്നണിക്ക് തുടർഭരണം ലഭിക്കരുതെന്നുമായിരുന്നു കെ. സച്ചിദാനന്ദൻ അഭിപ്രായപ്പെട്ടിരുന്നത്. ആ പ്രസ്താവനയ്ക്ക് നേരിട്ട് പ്രതികരിക്കാതെ നിന്ന പിണറായി വിജയൻ, മാസങ്ങൾക്കിപ്പുറം എം.കെ. സാനുവിന്റെ അനുസ്മരണ വേദിയിൽ അതിന് പരോക്ഷ മറുപടി നൽകിയെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
ഇടതുപക്ഷ സഹയാത്രികരായിരുന്ന എം.കെ. സാനുവിന്റെയും കെ. സച്ചിദാനന്ദന്റെയും നിലപാടുകൾ തമ്മിൽ താരതമ്യം ചെയ്തുള്ള പിണറായിയുടെ പരാമർശത്തിന് ഇനി സച്ചിദാനന്ദൻ എങ്ങനെ പ്രതികരിക്കുമെന്നതാണ് രാഷ്ട്രീയ കേന്ദ്രങ്ങൾ ഉറ്റുനോക്കുന്നത്.
