തലശ്ശേരി : മുഖ്യമന്ത്രി പിണറായി വിജയൻ ക്രൈസ്തവ വിശ്വാസി ആയിരുന്നെങ്കിൽ ഒരു മെത്രാനെങ്കിലും ആകുമായിരുന്നു എന്ന് മേജർ ആർച്ച് ബിഷപ് കർദിനാൾ മാർ ജോർജ് ആലഞ്ചേരി. തലശ്ശേരി ആർച്ച്ബിഷപ് മാർ ജോർജ് ഞറളക്കാട്ടിന്റെ പൗരോഹിത്യ സുവർണ ജൂബിലി ഉദ്ഘാടനം ചെയ്തുകൊണ്ടുള്ള മുഖ്യമന്ത്രിയുടെ പ്രസംഗത്തിനു പിന്നാലെയാണു കർദിനാളിന്റെ പ്രസ്താവന.
പ്രസംഗത്തിലുടനീളം മുഖ്യമന്ത്രി ബൈബിൾ വചനങ്ങൾ ഉദ്ധരിച്ചിരുന്നു. ആർച്ച്ബിഷപ്പിന്റെ അജപാലന ജീവിതത്തിലെ ഓരോ സംഭവങ്ങളും മുഖ്യമന്ത്രി പരാമർശിക്കുകയും ചെയ്തു. ഫ്രാൻസിസ് മാർപാപ്പയുടെ ചാക്രിക ലേഖനത്തിലെ സന്ദേശങ്ങളും മുഖ്യമന്ത്രിയുടെ പ്രസംഗത്തിൽ ഇടംപിടിച്ചു. ആർച്ച്ബിഷപ് മാർ ജോർജ് ഞറളക്കാട്ട് മെത്രാനായിരുന്നില്ലെങ്കിൽ ഒരു കർഷക നേതാവ് ആകുമായിരുന്നെന്നും ഡൽഹി കർഷക സമര വേദിയിൽ അദ്ദേഹത്തെ കണ്ടേനെയെന്നും കെ.മുരളീധരൻ എംപി പറഞ്ഞു.
