റാന്നി : സിമന്റുമായി പമ്പയ്ക്കു പോയ ടോറസ് ലോറി പ്ലാപ്പള്ളിക്കു സമീപം കൊക്കയിലേക്ക് മറിഞ്ഞ് ഡ്രൈവര് മരിച്ചു. ചങ്ങനാശേരിയിലെ ഏജന്സിയുടെ ലോറി ഓടിക്കുന്ന തമിഴ്നാട് തിരുനെല്വേലി സ്വദേശി മാരിയപ്പനാണ് കൊല്ലപ്പെട്ടത്. ളാഹക്കും പ്ലാപ്പള്ളിക്കുമിടയില് മയിലാടുപാറയില് കഴിഞ്ഞ 31ന് ഉച്ചയ്ക്കു ശേഷമാണ് സംഭവം. ഇന്ന് ഉച്ചയോടെ സംഭവം പുറം ലോകം അറിയുന്നത്.
റോഡില് നിന്നും കാണാനാകാത്ത വിധത്തില് വളരെ താഴെയാണ് ലോറിയും മൃതശരീരവും കിടന്നിരുന്നത്. വന വിഭവങ്ങള് ശേഖരിക്കാന് കാട്ടിലെത്തിയ ആദിവാസികള് ദുര്ഗന്ധം അനുഭവ പെട്ടതോടെ നടത്തിയ തെരച്ചിലിലാണ് മൃതശരീരം കണ്ടെത്തിയത്. അഗ്നിശമന സേനയും പോലീസും വനപാലകരും ചേര്ന്ന് സാഹസികമായിട്ടാണ് മൃതദേഹം റോഡില് എത്തിച്ചത്. ഇന്ക്വസ്റ്റ് നടപടികള്ക്കു ശേഷം മൃതദേഹം പോസ്റ്റുമോര്ട്ടത്തിനായി പത്തനംതിട്ട ജനറല് ആശുപത്രിയിലേക്ക് മാറ്റി.
