കൊച്ചി: മരടില് നിന്നും ഇന്നലെ കാണാതായ പ്ലസ് ടൂ വിദ്യാര്ത്ഥിനിയുടെ മൃതദേഹം തൃശൂരിലെ തേയിലത്തോട്ടത്തില് കണ്ടെത്തി. കഴിഞ്ഞ ദിവസം എറണാകുളത്തെ സ്വകാര്യ സ്കൂളില് നിന്നും കാണാതായ ഗോപിക എന്ന 17 കാരിയുടെ മൃതദേഹം മലക്കപ്പാറ വാല്പ്പാറയിലെ തേയിലത്തോട്ടത്തില് നിന്നും ഇന്നലെ രാത്രിയോടെയാണ് പോലീസ് കണ്ടെത്തിയത്.
സഫര് എന്ന യുവാവിനെ സംഭവത്തില് പോലീസ് അറസ്റ്റ് ചെയ്തു. പെണ്കുട്ടിയെ കൊലപ്പെടുത്തിയത് ഇയാളാണെന്ന് കുറ്റം സമ്മതിച്ചിട്ടുണ്ടെന്ന് പോലീസ് പറയുന്നു. പെണ്കുട്ടിയുമായി സൗഹൃദമുണ്ടായിരുന്നയാളാണ് പോലീസ് പിടിയിലായ സഫര്. ഇയാള് ഏതാനും നാള് മുമ്പാണ് പെണ്കുട്ടിയോട് പ്രണയാഭ്യര്ത്ഥന നടത്തിയത്. എന്നാല് പെണ്കുട്ടി ഇത് നിഷേധിച്ചിരുന്നു. തുടര്ന്ന് കൊല്ലുമെന്നും ഫോട്ടോകള് മോര്ഫ് ചെയ്ത് കാട്ടി ഈ രീതിയില് അപമാനിക്കുമെന്നും ഭീഷണിപ്പെടുത്തുകയും ചെയ്തിരുന്നു. യുവാവിന്റെ ശല്യത്തെ തുടര്ന്ന് ഗോപികയുടെ പിതാവ് സഫറിനെ താക്കീത് ചെയ്യുകയൂമുണ്ടായി. തുടര്ന്നാണ് കഴിഞ്ഞ ദിവസം പെണ്കുട്ടിയെ സഫര് കാറില് കയറ്റി കൊണ്ടുപോയി കൊലചെയ്തെന്നാണ് പോലീസ് ഭാഷ്യം. ഇന്നലെ സ്കൂള് സമയത്തിന് ശേഷമാണ് പെണ്കുട്ടിയെ കാണാതായത്.
ഇതേ തുടര്ന്ന് പിതാവ് പോലീസില് പരാതി നല്കുകയും ചെയ്തിരുന്നു. ഇതിന് പിന്നാലെയാണ് സഫര് ജോലി ചെയ്തിരുന്ന സര്വീസ് സെന്ററിലെ കാര് കാണാനില്ലെന്ന പരാതിയുമായി സ്ഥാപനത്തിലെ ആള്ക്കാരും പോലീസിനെ സമീപിച്ചത്. ഇതാണ് സംഭവം കണ്ടെത്തുന്നതിലേക്ക് നയിച്ചത്. തുടര്ന്ന കാര് ട്രാക്ക് ചെയ്ത പോലീസ് ഇത് ആതിരപ്പള്ളി വഴി സഞ്ചരിക്കുന്നതായും കാറില് ഒരു യുവാവും യുവതിയും ഉണ്ടെന്നും കണ്ടെത്തി. എന്നാല് തമിഴ്നാട് അതിര്ത്തിയില് എത്തിയപ്പോള് കാറില് യുവാവ് മാത്രമേ ഉണ്ടായിരുന്നുള്ളൂ. കാറിന്റെ പിന്സീറ്റില് രക്തക്കറ കണ്ടെത്തിയതിനെ തുടര്ന്ന് പോലീസ് നടത്തിയ ചോദ്യം ചെയ്യലില് ഗോപികയെ കൊലപ്പെടുത്തി തേയിലത്തോട്ടത്തില് ഉപേക്ഷിച്ചെന്ന് സഫര് പറഞ്ഞു. തുടര്ന്ന് ഇന്നലെ രാത്രി തമിഴ്നാട് പോലീസിന്റെ സഹായത്തോടെ നടത്തിയ തെരച്ചിലില് കേരളാ പോലീസ് മൃതദേഹം കണ്ടെത്തുകയും സഫറിനെ അറസ്റ്റ് ചെയ്യുകയും ചെയ്തു.
സഫര് പല തവണ മകളെ ശല്യം ചെയ്തിരുന്നെന്നും കൊല്ലുമെന്ന് ഭീഷണിപ്പെടുത്തിയെന്നും പിതാവ് പറഞ്ഞു. ഗോപികയെ വിവാഹം കഴിക്കണമെന്ന് ആവശ്യപ്പെട്ട് സഫര് തന്നെ കണ്ടിരുന്നതായും എന്നാല് പറ്റില്ലെന്ന് അറിയിക്കുകയും ചെയ്തതായി പിതാവ് പറഞ്ഞു. ഇന്നലെ രാവിലെ പിതാവ് തന്നെയാണ് മകളെ സ്കൂളില് കൊണ്ടുപോയി വിട്ടത്. സഫര് ജോലി ചെയ്തിരുന്ന സ്ഥാപനത്തില് സര്വീസിനായി കൊണ്ടുവന്ന കാറും കൊണ്ടാണ് സഫര് പോയത്.
