തിരുവനന്തപുരം: സംസ്ഥാനത്ത് പ്ലസ് വണ് ക്ലാസുകള് നാളെ മുതല് തുടങ്ങും. ആദ്യഘട്ടത്തിലെ മൂന്ന് അലോട്ട്മെന്റുകള് പൂര്ത്തിയായ സാഹചര്യത്തിലാണ് തീരുമാനം. സപ്ലിമെന്ററി അലോട്ട്മെന്റുകളും, സീറ്റ് കിട്ടാത്തവര്ക്ക് സൗകര്യമൊരുക്കാനുള്ള ശ്രമവും തുടരും. ക്ലാസുകള് തുടങ്ങാന് തടസ്സമില്ലെന്ന് കഴിഞ്ഞ ദിവസം വിദ്യാഭ്യാസമന്ത്രി വിളിച്ചുചേര്ത്ത ഉന്നതതല യോഗം വിലയിരുത്തിയിരുന്നു. ഓരോ സ്കൂളിലും പൊതുപരിപാടി വെച്ച ശേഷമായിരിക്കും കുട്ടികളെ സ്വാഗതം ചെയ്യുക. സ്കൂളുകളില് ക്ലാസ് മുറികളുടെ ക്രമീകരണവും ശുചീകരണവും ഇന്ന് പൂര്ത്തിയായി.
കഴിഞ്ഞ വര്ഷം ഓഗസ്റ്റ് 25നാണ് പ്ലസ് വണ് ക്ലാസുകള് തുടങ്ങാനായത്. ഇത്തവണ നിശ്ചയിച്ച സമയത്ത് തന്നെ ക്ലാസുകള് തുടങ്ങുന്നതിനാല് കൂടുതല് അധ്യയന ദിനങ്ങള് ലഭിക്കും. അതേസമയം, മഴക്കെടുതി മൂലം ജില്ലാ കളക്ടര്മാര് അവധി പ്രഖ്യാപിച്ച ജില്ലകളില് ഒന്നാം വര്ഷ പ്ലസ് വണ് വിദ്യാര്ത്ഥികളും സ്കൂളുകളില് ഹാജരാകേണ്ടതില്ലെന്ന് മന്ത്രി വി ശിവന്കുട്ടി അറിയിച്ചു. കനത്ത മഴയെ തുടര്ന്ന് കാസര്ഗോഡ്, കണ്ണൂര്, തൃശ്ശൂര്, കോട്ടയം, എറണാകുളം, ഇടുക്കി ജില്ലകളിലാണ് നിലവില് വിദ്യാഭ്യാസ സ്ഥാപനങ്ങള്ക്ക് ജില്ലാ കളക്ടര്മാര് അവധി പ്രഖ്യാപിച്ചിരിക്കുന്നത്.
