കല്ലമ്പലം : പോക്സോ കേസിൽ പ്രതിയായ നാവായിക്കുളം പഞ്ചായത്തംഗം സഫറുള്ള രാജിവെച്ചു. നാലാം വാർഡായ മരുതിക്കുന്നിലെ സി.പി.എം അംഗമാണ് സഫറുള്ള. ഇതോടെ വാർഡിൽ ഉപതിരഞ്ഞെടുപ്പു വേണ്ടിവരും. പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിൽ പ്രതിയായ സഫറുള്ള രാജിവെക്കണമെന്നാവശ്യപ്പെട്ട് പ്രതിപക്ഷമായ കോൺഗ്രസും ബി.ജെ.പിയും സമരപരിപാടികൾ സംഘടിപ്പിച്ചിരുന്നു.
ഇരുപത്തിരണ്ട് വാർഡുകളുള്ള നാവായിക്കുളം പഞ്ചായത്തിൽ ഭരണകക്ഷിയായ സി.പി.എമ്മിന് ഒന്പത് അംഗങ്ങളാണ് ഉണ്ടായിരുന്നത്. സഫറുള്ളയുടെ രാജിയോടെ അത് എട്ടായി ചുരുങ്ങി. അഞ്ചാം വാർഡായ മുക്കടയിൽ സി.പി.എം അംഗം നറുക്കെടുപ്പിലൂടെയാണ് തിരഞ്ഞെടുക്കപ്പെട്ടത്. ഇതുസംബന്ധിച്ച് പ്രതിപക്ഷം നൽകിയ കേസ് ഹൈക്കോടതിയുടെ പരിഗണനയിലുമാണ്. പ്രധാന പ്രതിപക്ഷമായ കോൺഗ്രസിന് എട്ടംഗങ്ങളാണുള്ളത്. ബി.ജെ.പി.ക്ക് അഞ്ചംഗങ്ങളാണുള്ളത്.
