തിരുവനന്തപുരം : സംസ്ഥാനത്ത് കഴിഞ്ഞ അഞ്ച് മാസത്തിനിടെ പോക്സോ നിയമപ്രകാരം ഏറ്റവും കൂടുതല് കേസുകള് രജിസ്റ്റര് ചെയ്തത് തിരുവനന്തപുരം ജില്ലയില്. ഇക്കാലയളവില് സംസ്ഥാനത്തൊട്ടാകെ പോക്സോ നിയമ പ്രകാരം 1,777 കേസുകള് രജിസ്റ്റര് ചെയ്തപ്പോള് തിരുവനന്തപുരത്ത് മാത്രം 228 കേസുകളാണ് രജിസ്റ്റര് ചെയ്തത്. ഈ വര്ഷം ജനുവരി മുതല് മെയ് വരെയുള്ള കാലയളവിലെ കണക്കുകള് സ്റ്റേറ്റ് ക്രൈം റെക്കോര്ഡ്സ് ബ്യൂറോയാണ് പുറത്തുവിട്ടത്.
കഴിഞ്ഞ വര്ഷം രജിസ്റ്റര് ചെയ്ത കേസുകളില് പകുതിയിലേറെയും ഈ അഞ്ച് മാസത്തിനുള്ളില് സംസ്ഥാനത്ത് രജിസ്റ്റര് ചെയ്തു. നഗരപ്രദേശങ്ങളില് 72 കേസുകളും ഗ്രാമപ്രദേശങ്ങളില് 156 കേസുകളും രജിസ്റ്റര് ചെയ്തു. 2021 ല് 3,559 കേസുകളും 2020 ല് 3,056 കേസുകളും,2019 ല് 3,640 കേസുകളും പോക്സോ നിയമ പ്രകാരം രജിസ്റ്റര് ചെയ്തു. കുട്ടികള്ക്കെതിരായ 2144 അക്രമ സംഭവങ്ങളിലും കേസുകള് രജിസ്റ്റര് ചെയ്തിട്ടുണ്ട്. ഇതില് മൂന്നെണ്ണം ശൈശവ വിവാഹങ്ങളാണ്.
