കൊച്ചി : സംസ്ഥാനത്ത് പോക്‌സോ കേസുകളുടെ എണ്ണത്തില്‍ വന്‍ വര്‍ധനവ്. ഈ വര്‍ഷം ഏപ്രില്‍ വരെ 416 കേസുകളാണ് സംസ്ഥാനത്ത് രജിസ്റ്റര്‍ ചെയ്തിട്ടുള്ളത്. ജില്ലാടിസ്ഥാനത്തില്‍ ഏറ്റവും കൂടുതല്‍ പോക്‌സോ കേസുകള്‍ റിപ്പോര്‍ട്ട് ചെയ്തിട്ടുള്ളത് മലപ്പുറം ജില്ലയിലാണ്. കേരള പോലീസിന്റെ ഔദ്യോഗിക വെബ്ബ്‌സൈറ്റിലാണ് കുട്ടികള്‍ക്ക് എതിരെയുള്ള അതിക്രമങ്ങളുടെ സ്ഥിതിവിവര കണക്കുകള്‍ നല്‍കിയിരിക്കുന്നത്. കഴിഞ്ഞ വര്‍ഷം രജിസ്റ്റര്‍ ചെയ്തതിനേക്കാള്‍ 100 കേസുകള്‍ കൂടുതലാണെന്നും ഏപ്രില്‍ വരെ ആകെ 1,384 പോക്‌സോ കേസുകള്‍ റിപ്പോര്‍ട്ട് ചെയ്തിട്ടുണ്ടെന്നും രേഖകള്‍ വ്യക്തമാകുന്നു.
ഏറ്റവും കൂടുതല്‍ പോക്‌സോ കേസുകള്‍ രേഖപ്പെടുത്തിയ മലപ്പുറത്ത് 113 കേസുകളാണ് ഏപ്രില്‍ വരെ രജിസ്റ്റര്‍ ചെയ്തിരിക്കുന്നത്. ഏറ്റവും കുറവ് കേസുകള്‍ കണ്ണൂര്‍ ജില്ലയിലുമാണ്. അതേസമയം ഈ വര്‍ഷം കുട്ടികളുടെ ആത്മഹത്യകള്‍ ഉണ്ടായിട്ടില്ലെന്നും പോലീസ് പറയുന്നു. കുട്ടികള്‍ക്കെതിരെയുള്ള അതിക്രമങ്ങള്‍ സംസ്ഥാനത്ത് വര്‍ധിച്ച്‌ വരികയാണെന്നാണ് കണക്കുകള്‍ സൂചിപ്പിക്കുന്നത്. പോലീസ് സ്റ്റേഷനില്‍ രജിസ്റ്റര്‍ ചെയ്യപ്പെടാതെ പോകുന്ന നിരവധി പോക്‌സോ കേസുകളും ഉണ്ടാകുമെന്നാണ് വിലയിരുത്തല്‍.
