ന്യൂഡൽഹി : പാക് അധീന കശ്മീരിൽ ഇപ്പോൾ നടന്നുകൊണ്ടിരിക്കുന്ന പ്രതിഷേധങ്ങൾ പാകിസ്ഥാന്റെ ‘പതിറ്റാണ്ടുകൾ നീണ്ട വ്യവസ്ഥാപിതമായ ചൂഷണത്തിന്റെയും മൗലികാവകാശങ്ങൾ നിഷേധിക്കുന്നതിന്റെയും’ ഫലമാണെന്ന് ഇന്ത്യ. ജനങ്ങളുടെ പരാതികൾ പരിഹരിക്കുന്നതിന് പകരം പാകിസ്ഥാൻ അമിതമായ ബലം ഉപയോഗിച്ചാണ് ഈ വിയോജിപ്പുകളോട് പ്രതികരിക്കുന്നതെന്ന് ഇന്ത്യൻ വിദേശകാര്യ മന്ത്രാലയം (MEA) ചൊവ്വാഴ്ച കുറ്റപ്പെടുത്തി. വിദേശകാര്യ മന്ത്രാലയ വക്താവ് രൺധീർ ജയ്സ്വാൾ നടത്തിയ മീഡിയ ബ്രീഫിങ്ങിലാണ് ഈ പരാമർശങ്ങൾ ഉണ്ടായത്. ഈ വിഷയത്തിന് പുറമെ, പശ്ചിമേഷ്യയിലെ സംഘർഷങ്ങളും കപ്പലുകൾക്ക് നേരെയുള്ള ആക്രമണങ്ങളും ഇന്ത്യ അതീവ ഗൗരവത്തോടെയാണ് കാണുന്നതെന്നും ഹോർമുസ് കടലിടുക്കിലൂടെയുള്ള സുരക്ഷിതമായ കപ്പൽ ഗതാഗതം ഉറപ്പാക്കണമെന്ന് ആവശ്യപ്പെടുകയും ചെയ്തു.
‘പാക് അധീന ജമ്മു കശ്മീരിൽ നടന്നുകൊണ്ടിരിക്കുന്ന പ്രതിഷേധങ്ങൾ പാകിസ്താന്റെ പതിറ്റാണ്ടുകൾ നീണ്ട വ്യവസ്ഥാപിതമായ ചൂഷണത്തിന്റെയും, മൗലികാവകാശങ്ങൾ നിഷേധിക്കുന്നതിന്റെയും, അനധികൃതമായി കൈവശപ്പെടുത്തിയ പ്രദേശങ്ങളിലെ ഭരണപരമായ അടിച്ചമർത്തലുകളുടെയും നേരിട്ടുള്ള പ്രത്യാഘാതമാണ്.’ ജയ്സ്വാൾ പറഞ്ഞു. ‘പ്രാദേശിക ജനതയുടെ നിയമാനുസൃതമായ പരാതികൾ പരിഹരിക്കുന്നതിന് പകരം, പാകിസ്ഥാൻ ഭരണകൂടം അമിതമായ പോലീസ് അതിക്രമങ്ങളിലൂടെയാണ് പ്രതികരിക്കുന്നത്. സാധാരണ ജനങ്ങൾക്ക് നേരെയുള്ള ഈ കടുത്ത അധിക്ഷേപങ്ങൾക്കും തെറ്റായ നടപടികൾക്കും അന്താരാഷ്ട്ര സമൂഹം പാകിസ്താനെ പൂർണമായും ഉത്തരവാദികളാക്കുമെന്ന് ഞങ്ങൾ പ്രതീക്ഷിക്കുകയും ആഗ്രഹിക്കുകയും ചെയ്യുന്നു.’ അദ്ദേഹം പറഞ്ഞു.
പാക് അധീന ജമ്മു കശ്മീർ ഇന്ത്യയുടെ അവിഭാജ്യ ഘടകമാണെന്ന് ഇന്ത്യ നിരന്തരം നിലപാടെടുത്തിട്ടുണ്ട്, കൂടാതെ പാകിസ്ഥാൻ ഈ മേഖലയിലെ മനുഷ്യാവകാശ ലംഘനങ്ങൾ നടത്തുന്നതായും ജനങ്ങളുടെ അവകാശങ്ങൾ അടിച്ചമർത്തുന്നതായും ആവർത്തിച്ച് കുറ്റപ്പെടുത്തിയിട്ടുമുണ്ട്. പാക് അധീന കശ്മീരിലെ പ്രതിഷേധങ്ങൾക്ക് പുറമെ, പശ്ചിമേഷ്യയിലെ സംഭവവികാസങ്ങളെക്കുറിച്ചും വിദേശകാര്യ മന്ത്രാലയം പ്രതികരിച്ചു.
