റാന്നി : മീൻ വറുത്തത് വിളമ്പി നൽകിയില്ലെന്ന നിസ്സാര കാരണത്താൽ ഭാര്യയെ ക്രൂരമായി മർദ്ദിച്ച സംഭവത്തിൽ ഓട്ടോ ഡ്രൈവറായ ഭർത്താവിനെ പോലീസ് കസ്റ്റഡിയിലെടുത്തു. ഐത്തല പടിയറ വീട്ടിൽ റെജിയെയാണ് റാന്നി പോലീസ് പിടികൂടിയത്. ഇട്ടിയപ്പാറ ഐത്തല റോഡില് മൂഴിക്കല് ജംഗ്ഷനില് ഓട്ടോ ഡ്രൈവറായി ജോലി ചെയ്ത് വരികയായിരുന്നു റെജി. ഇയാൾ ഭാര്യയെ ക്രൂരമായി മർദ്ദിക്കുന്നതിന്റെ ദൃശ്യങ്ങൾ കഴിഞ്ഞ ദിവസങ്ങളിൽ സമൂഹമാധ്യമങ്ങളിൽ വ്യാപകമായി പ്രചരിച്ചിരുന്നു.
സംഭവം വിവാദമായതോടെ വലിയ പ്രതിഷേധമാണ് ഉയർന്നുവന്നത്. തുടർന്ന് മർദ്ദനത്തിനിരയായ ഭാര്യ റാന്നി പോലീസ് സ്റ്റേഷനിൽ നേരിട്ടെത്തി പരാതി നൽകുകയായിരുന്നു. പരാതിയുടെയും പ്രചരിച്ച ദൃശ്യങ്ങളുടെയും അടിസ്ഥാനത്തിൽ കേസ് രജിസ്റ്റർ ചെയ്ത റാന്നി പോലീസ് നടത്തിയ തെരച്ചിലിലാണ് കഴിഞ്ഞ ദിവസം വൈകുന്നേരം പ്രതിയെ കസ്റ്റഡിയിലെടുത്തത്. സംഭവത്തിൽ കൂടുതൽ നിയമ നടപടികൾ പുരോഗമിക്കുകയാണെന്ന് റാന്നി പോലീസ് അറിയിച്ചു.
