കൊച്ചി : മന്ത്രി കെ.ടി ജലീലിനെ സോഷ്യല് മീഡിയയിലൂടെ അപകീര്ത്തിപ്പെടുത്തിയെന്ന കേസില് യൂത്ത് ലീഗ് പ്രവര്ത്തകന് യാസര് എടപ്പാളിനെ പോലീസ് അറസ്റ്റ് ചെയ്തു. മന്ത്രി കെ ടി ജലീലിന്റെ പരാതിയിലെ കേസിലാണ് അറസ്റ്റ്. വിദേശത്ത് ജോലി ചെയ്തിരുന്ന യാസര് എടപ്പാള് തിരിച്ചെത്തിയപ്പോള് നെടുമ്പാശ്ശേരി വിമാനത്താവളത്തില് വെച്ചാണ് ചങ്ങരംകുളം പോലീസ് അറസ്റ്റ് ചെയ്തത്. പിന്നീട് ഇദ്ദേഹത്തെ ജാമ്യത്തില് വിട്ടു.
മന്ത്രിക്ക് എതിരെ സോഷ്യല് മീഡിയയില് അപകീര്ത്തികരമായ പോസ്റ്റിട്ടതിന്റെ പേരില് പോലീസിനെ ഉപയോഗിച്ച് യാസറിന്റെ വീട് റെയ്ഡ് ചെയ്തതായി ആരോപണമുണ്ടായിരുന്നു. ദുബായില് ജോലി ചെയ്യുന്ന എടപ്പാള് സ്വദേശി യാസര് എടപ്പാളിനെ, നാടുകടത്തി കേരളത്തിലെത്തിക്കാന് മന്ത്രി ജലീല് കോണ്സുലേറ്റ് സഹായം തേടിയെന്നും സ്വര്ണക്കടത്ത് കേസിലെ പ്രതി സ്വപ്ന ഇഡിക്ക് മൊഴി നല്കിയിരുന്നു.
