തിരുവനന്തപുരം: തിരുവനന്തപുരം കാട്ടാക്കട കോളേജിലെ എസ് എഫ് ഐ ആള്മാറാട്ടത്തില് പ്രിന്സിപ്പലിനും എസ്എഫ്ഐ നേതാവ് വിശാഖിനുമെതിരെ പോലീസ് കേസെടുത്തു. ആള്മാറാട്ടം, വ്യാജ രേഖ ചമക്കല്, വിശ്വാസ വഞ്ചന എന്നിയ്ക്കാണ് പ്രിന്സിപ്പല് ജി ജെ ഷൈജു, വിദ്യാര്ത്ഥി വിശാഖ് എന്നിവര്ക്കെതിരെ കാട്ടാക്കട പോലീസ് കേസെടുത്തത്. സര്വ്വകലാശാല നല്കിയ പരാതിയിന്മേലാണ് നടപടി. കോളജ് പ്രിന്സിപ്പല് ജി ജെ ഷൈജുവിനെ ഒന്നാം പ്രതിയാക്കിയാണ് കേസ്. എസ്എഫ്ഐ നേതാവ് വിശാഖ് ആണ് രണ്ടാം പ്രതി.
കഴിഞ്ഞ ദിവസം ചേര്ന്ന സിന്ഡിക്കേറ്റിലാണ് ജി.ജെ ഷൈജുവിനെതിരെ നടപടിയെടുക്കാനും പോലീസില് പരാതി നല്കാനും സര്വകലാശാല തീരുമാനിച്ചത്. ജി.ജെ ഷൈജുവിനെ സര്വകലാശാല പുറത്താക്കുകയും ചെയ്തിരുന്നു. എസ്എഫ്ഐ നേതാവായിരുന്ന എ വിശാഖും പ്രിന്സിപ്പലായിരുന്ന ജി ജെ ഷൈജുവും ആസൂത്രിത നീക്കം നടത്തി മത്സരിച്ച് ജയിച്ച യുയുസിയുടെ പേര് വെട്ടി തെരഞ്ഞെടുപ്പില് മത്സരിക്കാത്ത വിശാഖിന്റെ പേര് ചേര്ത്തുവെന്നായിരുന്നു പരാതി.
